ՆԳ նախարարության աշխատակիցները Թբիլիսիի, Գուրիայի և Իմերեթիի շրջաններում առգրավել են ապօրինի զենք և զինամթերք, ձեռնարկված օպերատիվ-հետախուզական և քննչական գործողությունների արդյունքում բերման է ենթարկվել 6 մարդ,- այս մասին հաղորդում է ՆԳ նախարարությունը։

Գերատեսչության տվյալներով՝ Թբիլիսիի ոստիկանության Վակե-Սաբուրթալոյի գլխավոր բաժնի աշխատակիցները ձերբակալել են 1991 թվականին ծնված Լ.Ջ.-ին, ով նախկինում դատապարտվել է տարբեր հանցագործությունների համար՝ ապօրինի զենք-զինամթերք գնելու, պահելու և կրելու մեղադրանքով։

Ձերբակալվածի անձնական և բնակարանի խուզարկության ընթացքում իրավապահները որպես ապացույց առգրավել են «Մակարով» տիպի հրազեն, ռազմամթերք և 15 պարկուճ։

Ոստիկանության Գուրիայի բաժնի աշխատակիցները ապօրինի հրազեն, ռազմամթերք գնելու և պահելու մեղադրանքով բերման են ենթարկել 1963 թվականին ծնված Ջ.Ջ.-ին։ Նա ձերբակալվել է Չոխատաուրիի մունիցիպալիտետի գյուղերից մեկում։ Ջ.Ջ.-ի տանը խուզարկության ժամանակ ոստիկանները առգրավել են «Կալաշնիկով» ինքնաձիգ, «Վինչեստեր» տեսակի որսորդական հրացան, ատրճանակ և 20 փամփուշտ:

Նույն բաժնի Օզուրգեթիի շրջանային բաժնի ծառայողները ապօրինի հրազեն, ռազմամթերք գնելու և պահելու մեղադրանքով ձերբակալել են 1968 թվականին ծնված Զ.Գ.-ին։ Մեղադրյալի տանը խուզարկության արդյունքում որպես ապացույց առգրավվել է երկփողանի որսորդական հրացան, ատրճանակ և 15 փամփուշտ։

Ոստիկանության Իմերեթիի, Ռաճա-Լեչխումիի և Քվեմո Սվանեթիի բաժնի ծառայողները բերման են ենթարկել 1993 թվականին ծնված, նախկինում դատապարտված Դ.Ա.-ին։ Զեստափոնիում նրա տանը և օժանդակ խանութում խուզարկության ժամանակ հայտնաբերվել են Կալաշնիկովի ինքնաձիգեր, ատրճանակ, երկու ինքնաձիգ և 30 փամփուշտ:

Սամեգրելո-Զեմո Սվանեթիի ոստիկանության Զուգդիդիի և Ծալենջիխայի շրջանային բաժանմունքի ծառայողները, ձերբակալել են նախկինում գողության համար դատապարտված, 1967 թվականին ծնված Վ.Կ.-ին։ Նա մեղադրվում է ապօրինի հրազեն, ռազմամթերք գնել-պահելու-կրելու մեջ։ Ոստիկանները բերման ենթարկվածների անձնական և տրանսպորտային միջոցների խուզարկության արդյունքում որպես ապացույց առգրավել են 2 ատրճանակ և պարկուճ։

Հանցագործությունները նախատեսում են առավելագույնը 3-ից 7 տարվա ազատազրկում։

Ապօրինի կերպով հրազեն և ռազմամթերք գնելու, պահելու և կրելու փաստը հետաքննվում է Վրաստանի Քրեական օրենսգրքի 236-րդ հոդվածի 3-րդ և 4-րդ մասերով»,- հայտնել են ՆԳ նախարարությունից։