ՆԳ նախարարության Թբիլիսիի ոստիկանության վարչության, Հին Թբիլիսիի գլխավոր բաժնի աշխատակիցները, թեժ հետախուզական գործողությունների և քննչական գործողությունների արդյունքում, նախկինում դատապարտված, 1987 թվականին ծնված Լ.Մ.-ին ձերբակալել են ծանրացուցիչ հանգամանքներում սպանության փորձի և պայթուցիկ սարքի ապօրինի ձեռքբերման, պահման մեղադրանքով։ Այս մասին տեղեկություն է տարածում ՆԳ նախարարությունը։

Գերատեսչության տվյալներով՝ հետաքննությունը պարզել է, որ այս տարվա հոկտեմբերի 22-ին Թբիլիսիում, Լաղիձեի փողոցում մեղադրյալը վիճաբանել է չորս անձի հետ, որի ժամանակ ձեռքի նռնակ է նետել նրանց ուղղությամբ և թաքնվել դեպքի վայրից։

«Ձեռքի նռնակի պայթյունի հետեւանքով տուժել է 3 մարդ՝ 1994 թվականին ծնված Լ.Բ.-ն, 1991 թվականին ծնված Գ.Ա.-ն  և 1983 թվականին ծնված Գ.Զ.-ն։ Նրանք երեքն էլ հիվանդանոցում ստանում են համապատասխան բուժօգնություն։

Դեպքից մի քանի ժամ անց ոստիկանները ձերբակալել են մեղադրյալին տաք հետքերով։

Ծանրացուցիչ հանգամանքներում երեք անձի նկատմամբ կատարված սպանության փորձի, ինչպես նաև պայթուցիկ սարքի ապօրինի ձեռքբերման, պահպանման և կրելու փաստի առթիվ հետաքննությունը տարվում է Վրաստանի քրեական օրենսգրքի 19-109-րդ և 236-րդ հոդվածներով։

Հանցագործությունը պատժվում է 16-ից 20 տարի ժամկետով կամ ցմահ ազատազրկմամբ»,- ասված է ՆԳ նախարարության տեղեկատվության մեջ։