Թբիլիսիի թիվ 21 հանրային դպրոցի աշակերտներն ու ծնողները բողոքի ցույց են անցկացնում
Թբիլիսիի թիվ 21 հանրային դպրոցի աշակերտների ծնողները բողոքի ցույց են անցկացրել դպրոցի դիմաց։ Ծնողների խոսքով՝ ցույցի պատճառը կարճ հաղորդագրությունն է եղել, որից նրանք իմացել են, որ շենքը խարխուլ վիճակում է, և, հաշվի առնելով փորձագետի եզրակացությունը, ուսումնական գործընթացը պետք է դադարեցվի, իսկ աշակերտները պետք է տեղափոխվեն այլ դպրոցներ։
Ծնողների խոսքով՝ ծանուցումը դպրոցի վարչակազմից ստացվել է ուսումնական գործընթացի մեկնարկից մեկ օր առաջ։ Թիվ 21 դպրոցի աշակերտների ծնողները չեն բացառում, որ օրակարգում կարող է լինել շենքը վաճառելու կամ քանդելու սպառնալիքը։
Ինչպես ծնողներն են ասում, եթե պարզվի, որ նախկին գերմանական դպրոցում ուսումը շարունակելն անհնար է, ապա ուսուցչական կազմը պետք է լիովին պահպանվի և այլընտրանքային տարածք հատկացվի։ Նրանք հրաժարվում են հեռավար շարունակել ուսումը։
Կրթության նախարարության և քաղաքային զարգացման հիմնադրամի ներկայացուցիչները այսօր հանդիպում են անցկացրել նաև դպրոցի վարչակազմի հետ։ Ինչպես հանդիպումից հետո հայտարարել է դպրոցի տնօրենը, երեկ կեսօրին դպրոցը տեղեկացել է, որ շենքը գտնվում է արտակարգ իրավիճակում, և դասերը պետք է դադարեցվեն։
Կողմերը համաձայնության եկան, որ հաջորդ շաբաթվա ընթացքում կգտնվի այլընտրանքային լուծում, որը լիովին կպաշտպանի երեխաների շահերը և կբավարարի դպրոցական համայնքին։