ԱՄՆ նախագահի հատուկ ներկայացուցիչ Սթիվ Ուիթքոֆը հայտարարել է, որ ԱՄՆ-ի, Եգիպտոսի, Քատարի և Թուրքիայի ներկայացուցիչները Մայամիում հանդիպել են՝ քննարկելու Գազայի հրադադարի առաջին փուլի արդյունքները և պլանավորելու երկրորդ փուլի նախապատրաստական քայլերը։

Ուիթքոֆի խոսքով՝ քննարկումներում հատուկ ուշադրություն է դարձվել Գազայի հատվածում միասնական կառավարության ղեկավարությամբ կառավարման մարմնի ստեղծման անհրաժեշտությանը, որը կապահովի խաղաղ բնակչության պաշտպանությունը և հասարակական կարգի պահպանությունը։

«Առաջին փուլը դրական արդյունքներ ունեցավ՝ ներառյալ հումանիտար օգնության ընդլայնումը, պատանդների վերադարձը, ուժերի մասնակի դուրսբերումն ու ռազմական գործողությունների նվազեցումը։ Երկրորդ փուլի շուրջ քննարկումներում մենք կարևորեցինք այնպիսի կառույցի ստեղծումը, որը գործելու է միասնական իշխանության ներքո՝ քաղաքացիական պաշտպանություն և հասարակական կարգ ապահովելու համար», – գրել է Ուիթքոֆը։

Նա նաև նշել է, որ կողմերը քննարկել են տարածաշրջանային ինտեգրացիայի միջոցներ, ինչպիսիք են՝ առևտրի խթանումը, ենթակառուցվածքների զարգացումը և էներգետիկ, ջրային ու այլ ռեսուրսների համատեղ օգտագործումը՝ որպես Գազայի վերականգնման, կայունության և երկարաժամկետ բարեկեցության պայման։

Ուիթքոֆը հավելել է, որ կողմերը աջակցություն են հայտնել «Խաղաղության խորհրդի» ստեղծմանը՝ որպես անցումային վարչակազմի, որը կգործի քաղաքացիական վերակառուցման, անվտանգության և վերականգնման ուղղությամբ։ Նա կոչ է արել բոլոր կողմերին պահպանել Դոնալդ Թրամփի 20-կետանոց խաղաղության ծրագրով ստանձնած պարտավորությունները։

«Մենք ընդգծում ենք հաջորդ քայլերի կարևորությունը՝ Գազայի համապարփակ խաղաղության ծրագրի փուլային իրականացման շրջանակում՝ համագործակցելով տեղական ինստիտուտների և միջազգային գործընկերների հետ։ Մենք վերահաստատում ենք մեր լիարժեք հանձնառությունը նախագահ Թրամփի 20-կետանոց խաղաղության ծրագրի նկատմամբ և կոչ ենք անում բոլոր կողմերին՝ պահպանել իրենց պարտավորությունները, ցուցաբերել զսպվածություն և ակտիվորեն ներգրավվել մոնիտորինգի մեխանիզմներում։ Հաջորդ խորհրդակցությունները կշարունակվեն առաջիկա շաբաթներին», – գրել է Ուիթքոֆը։