Վրաստանում ներքին զբոսաշրջության բացման հետ կապված Վրաստանի կրթության, գիտության, մշակույթի և սպորտի նախարարությունն ստեղծել է Վրաստանի մշակութային երթուղիների առաջին բջջային հավելվածը: Նախարարության նախաձեռնությամբ, ստեղծված «Cultural Routes Georgia» անվճար բջջային հավելվածը հասանելի է ինչպես Android, այնպես էլ՝ iOS հարթակների համար:

Նախարարության փոխանցմամբ, այս պահի դրությամբ բջջային հավելվածի վրա զետեղված են Եվրոպայի խորհրդի և նախարարության կողմից սերտիֆիկացված երթուղիները: Առաջիկայում կավելանա երկու նոր սերտիֆիկացված երթուղի:

Եվրոպական երթուղիներ.

• գինու երթուղի
• եբրայական ժառանգության եվրոպական երթուղի
• նախապատմական ժայռի արվեստի եվրոպական երթուղի
• պատմական ջերմային քաղաքների եվրոպական երթուղի

Տեղական երթուղիներ.

• Ալեքսանդրե Դյումայի հետքերով
• գերմանական բնակավայրեր Վրաստանում:

Նոր որակավորված երթուղիներ.

• մայրաքաղաքից մինչև մայրաքաղաք
• Սուրբ Անդրեաս առաքյալի ճանապարհը:

Մշակութային զբոսաշրջության աջակցության և զարգացման նպատակով, Վրաստանի կրթության, գիտության, մշակույթի և սպորտի նախարարի տեղակալ Լևան Խառատիշվիլին և Վրաստանի զբոսաշրջության ազգային վարչության ղեկավար Մարիամ Քվրիվիշվիլին ստորագրել են փոխհամագործակցության հուշագիր:

Միջոցառման շրջանակներում անցկացվել է նախարարության կողմից որակավորված երկու նոր մշակութային երթուղիների շնորհանդես, որնառաջիկայում կլինի հասանելի:

Վրաստանը 2016 թվականին դարձել է «Եվրոպայի խորհրդի մշակութային երթուղիների ընդլայնված մասային համաձայնագրի» 27-րդ անդամը: Եվրոպայի խորհրդի մշակութային երթուղիների ծրագիրն ընդգրկում է 38 որակավորված երթուղի, որը հատում է 57 երկիր և ավելի քան 1500 քաղաք: