Սկսվել է Սալոմե Զուրաբիշվիլիի պաշտոնական այցը Ռումինիա
Մեկնարկել է Վրաստանի նախագահ Սալոմե Զուրաբիշվիլիի պաշտոնական այցը Ռումինիա։
Բուխարեստի «Հենրի Կոանդա» միջազգային օդանավակայանում կայացել է Սալոմե Զուրաբիշվիլիի դիմավորման արարողությունը։
Նախագահին «Հենրի Կոանդա» միջազգային օդանավակայանում դիմավորել են՝ Ռումինիայում Վրաստանի դեսպան Նիկոլոզ Նիկոլոզիշվիլին, արտաքին գործերի նախարարության պետական քարտուղար Ջուլիան Ֆոտան, Վրաստանում Ռումինիայի դեսպան Ռազվան Ռոտունդուն։
Ռումինիայում Վրաստանի դեսպան Նիկոլոզ Նիկոլոզիշվիլիի խոսքով, այս այցը ունի և՛ խորհրդանշական, և՛ գործնական նպատակ։ Նրա պարզաբանմամբ՝ այցին պատմական նշանակություն է տալիս այն փաստը, որ նախագահները ստորագրելու են փաստաթուղթ՝ «Վրաստանի և Ռումինիայի միջև ռազմավարական հարաբերություններ հաստատելու մասին» համատեղ հռչակագիրը։
«Ռումինիան Վրաստանի ինքնիշխանության, տարածքային ամբողջականության, Վրաստանի եվրոպական ու եվրատլանտյան նկրտումների անսասան կողմնակիցն է։ 2019 թվականին մենք նշեցինք վրաց-ռումինական հարաբերությունների 300-ամյակը, իսկ այս տարի նշում ենք դիվանագիտական հարաբերությունների հաստատման երեսունամյակը։ Վրաստանի նախագահը հանդիպում կունենա իր ռումինացի գործընկերոջ՝ նախագահ Կլաուս Յոհանիսի, ինչպես նաև վարչապետի և Ռումինիայի խորհրդարանի Պատգամավորների պալատի և Սենատի նախագահների հետ։ Վրաստանի նախագահը կայցելի նաև Ռումինիայի Կոստանցա նավահանգստային քաղաք»,- ասել է Ռումինիայում Վրաստանի դեսպանը։
Վրաստանի պաշտոնական պատվիրակության կազմում են՝ Ռումինիայում Վրաստանի արտակարգ և լիազոր դեսպան Նիկոլոզ Նիկոլոզիշվիլին, Վրաստանի արտաքին գործերի փոխնախարար Թեյմուրազ Ջանջալիան, Ռումինիայի խորհրդարանի հետ բարեկամության խմբի անդամ Թեոնա Աքուբարդիան, Վրաստանի ծովային տրանսպորտի գործակալության փոխտնօրեն Իվանե Աբաշիձեն, Վրաստանի Կասպից և Սևծովյան տարածաշրջանների էներգետիկայի և տարանցման հարցերով նախագահի խորհրդական Լիանա Ջերվալիձեն:
Տեղեկությունը տարածել է Վրաստանի նախագահի վարչակազմը։