Սի Ձինփինի կարծիքով՝ Եվրամիությունն ու Չինաստանը պետք է ավելի սերտ կապեր ունենան։ Չինաստանի ղեկավարն այս մասին հայտարարել է Փարիզ կատարած այցի ժամանակ, որտեղ հանդիպել է Ֆրանսիայի նախագահ Էմանուել Մակրոնի և Եվրահանձնաժողովի նախագահ Ուրսուլա ֆոն դեր Լեյենի հետ։

Սի Ցինփինի խոսքով՝ «աշխարհում երկու կարևոր տերություններ պետք է գործընկերային դիրքորոշում որդեգրեն, պետք է հետամուտ լինեն երկխոսության և համագործակցության»։

Չինաստանի ղեկավարի խոսքով՝ երկու կողմերը պետք է իրականացնեն ռազմավարական համագործակցություն և նպաստեն «կայուն և առողջ զարգացմանը, նպաստեն համաշխարհային խաղաղությանն ու զարգացմանը»։

Իր հերթին Ֆրանսիայի նախագահն ասել է, որ Չինաստանը և Եվրամիությունը պետք է հավասար պայմաններ ապահովեն բոլոր դերակատարների համար։ Նրա խոսքով, միջազգային իրավիճակն ավելի է կարևորում ԵՄ-Չինաստան երկխոսությունը։ Նրա խոսքով, հանդիպմանը կքննարկվի Ուկրաինայի հարցը եւ ներկայիս իրավիճակը Մերձավոր Արեւելքում։

Մակրոնի խոսքով, շատ կարևոր է, որ այդ հարցերի շուրջ Չինաստանի և Եվրամիության միջև համակարգում լինի։

Եվրահանձնաժողովի նախագահը խոսել է նաև Չինաստանի եւ Եվրամիության միջև համագործակցության կարեւորության մասին։

«ԵՄ-ն և Չինաստանը ցանկանում են լավ հարաբերություններ, և հաշվի առնելով Չինաստանի գլոբալ կշիռը, մեր համագործակցությունը կարևոր է փոխադարձ հարգանք ապահովելու, թյուրիմացություններից խուսափելու և գլոբալ մարտահրավերներին լուծումներ գտնելու համար»: ԵՄ-ն և Չինաստանը ընդհանուր շահ ունեն խաղաղության և անվտանգության հարցում. Մենք վճռական ենք դադարեցնել Ռուսաստանի ագրեսիվ պատերազմն Ուկրաինայի դեմ»,- ասել է Ուրսուլա ֆոն դեր Լեյենը։

Նա նաև ուշադրություն է հրավիրել առևտրային հարաբերություններում առկա մարտահրավերների վրա։

«Մեր օրական ապրանքաշրջանառությունը կազմում է 2,3 միլիարդ եվրո, սակայն այս հարաբերություններում կան մարտահրավերներ։ Օրինակ՝ պետության կողմից առաջացած գերհզորությունը, շուկայի անհավասար հասանելիությունը և գերկախվածությունը: Մենք այսօր կքննարկենք այդ հարցերը»,- ասել է Եվրահանձնաժողովի նախագահը։

Ի գիտություն, Եվրամիությունը մտահոգված է Չինաստանի կառավարության կողմից որոշ ոլորտներում իրականացվող պետական ​​սուբսիդիաներով, որոնք, ըստ Բրյուսելի, անհավասար պայմաններ են ստեղծում և վտանգում Եվրամիության շուկան։