Շիդա Քարթլիի վարչական սահմանամերձ Կոդիծղարո գյուղում բացվել է օգտագործված շարժիչային յուղերի վերամշակման գործարան։

Ձեռնարկություն – «Վրաստանի ունիվերսալ գրուպ»-ը կառուցվել է «Գործընկերության հիմնադրամ»-ի «Ստարտափ Վրաստան» ծրագրի և USAID-ի «Աճը Վրաստանում» նախագծի աջակցությամբ։

Ձեռնարկությունն այսօր պաշտոնապես բացել են Գործընկերության հիմնադրամի գործադիր տնօրեն Դավիթ Սագանելիձեն, USAID/Վրաստան-ի առաքելության տնօրեն Փիթեր Վիբլերը, Վրաստանի շրջակա միջավայրի և գյուղատնտեսության փոխնախարար Սոլոմոն Պավլիաշվիլին, «Ստարտափ Վրաստան» ծրագրի տնօրեն Գիորգի Լոմիձեն և USAID-ի «Աճը Վրաստանում» նախագծի ղեկավար Քեթևան Ճումբուրիձեն:

«Այսօր բացվեց առաջին բարձր տեխնոլոգիական ձեռնարկությունը տարածաշրջանի և ընդհանրապես Վրաստանի համար, որը թույլ կտա մեզ մշակել օգտագործված շարժիչային յուղերը ժամանակակից տեխնոլոգիաներով՝ շրջակա միջավայրի վրա վնասակար ազդեցություններից հնարավորինս խուսափելու համար։ Վերամշակող գործարանի այս տեսակը երկրի էկոլոգիական իրավիճակի բարելավման հիմնական գործոններից մեկն է: Ուրախ եմ, որ մասնավոր հատվածը պետության և USAID-ի հետ միասին ստեղծում է այնպիսի տեսակի արտադրամաս բռնազավթված գծի մոտակայքում, որը գտնում եմ խթան կհանդիսանա այս ոլորտի զարգացմանը Վրաստանում»,- նշել է «Ստարտափ Վրաստանի» տնօրեն Գիորգի Լոմիձեն:

Նախագիծը նպաստում է Վրաստանում էկոլոգիական միջավայրի բարելավմանը, օգտագործված շարժիչային յուղերի, ներառյալ շարժիչի, հիդրավլիկ և փոխանցման տուփի յուղերի բարձր տեխնոլոգիական մշակման գործընթացին, որը լիովին անվտանգ է և լիովին համապատասխանում է միջազգային բնապահպանական չափանիշներին:

Այն Վրաստանում առաջին ընկերությունն է, որը վերամշակում է երկրորդային նավթը նորարարական «մոլեկուլային տարրալուծման» մեթոդով և արտադրում է 4 տարբեր տեսակի արտադրանք (դիզելային վառելիք, հեղուկ մազութ/բիտում, բարձր օկտանային բենզին և մեթան գազ): Արտադրության համար կօգտագործվեն տեղական թափոնները, իսկ հիմնական շուկան կլինի Վրաստանը։ Ձեռնարկությունում կաշխատեն օկուպացիոն գծին հարող գյուղերում բնակվող տեղացիները, և դա կաջակցի վարչական բաժանարար գծին հարող գյուղերում բիզնեսի զարգացմանը։

2019-2021 թվականներին Գործընկերության հիմնադրամի «Ստարտափ Վրաստան» ծրագրի և USAID-ի «Աճը Վրաստանում» նախագծի գործընկերության շրջանակներում Վրաստանի մարզերում ֆինանսավորվել են հինգ ստարտափ նախագծեր։ Այս նախագծերի իրականացման համար ներդրումը կազմել է երեք միլիոն լարի։