Շառլ Միշելի համաձայնագիրը կյանքի կոչելու նպատակով ստեղծվել է աշխատանքային խումբ, որը կգլխավորի Վիոլա ֆոն Կրամոնը
Ապրիլի 19-ի համաձայնագրով նախատեսված «Ժան Մոնեի երկխոսությունը» կգլխավորի Եվրախորհրդարանի պատգամավոր Վիոլա ֆոն Կրամոնը:
Տեղեկությունը Վրաստանի Առաջին ալիքին հաստատել է անձամբ եվրապատգամավորը:
Ինչպես Վիոլա ֆոն Կրամոնը հայտարարում է Վրաստանի Առաջին ալիքին տված բացառիկ հարցազրույցում, Եվրախորհրդարանի նախաձեռնությամբ ինքը կգլխավորի աշխատանքային խումբը, որը կաշխատի վրացի պատգամավորների հետ՝ Շառլ Միշելի միջնորդությամբ կնքված համաձայնագրում նշված նպատակներին հասնելու համար:
«Ժան Մոնեի երկխոսությունը» նախատեսվում է սկսել հունիսին: Միաժամանակ, Եվրախորհրդարանի պատգամավորը հույս ունի, որ հուլիսին կժամանի Վրաստան և Եվրախորհրդարանի անունից կվարի բանակցություններ:
«Ժան Մոնեի երկխոսությունը» Եվրախորհրդարանի կողմից մշակված գործիք է հանուն խաղաղության և ժողովրդավարության, որը միավորում է խորհրդարանական միջնորդությունն ու երկխոսությունը:
Այս ձևաչափը նախատեսում է երկխոսություն քաղաքական առաջնորդների միջև՝ ազգային քաղաքականության համար կարևոր հարցերի շուրջ փոխզիջման հասնելու համար:
Եվրախորհրդարանը «Ժան Մոնեի երկխոսության» մեթոդն առաջին անգամ կիրառել է 2016 թվականին՝ Ուկրաինայի Ռադայի հետ համագործակցության շրջանակներում:
Եվրախորհրդարանի պատգամավոր Վիոլա ֆոն Կրամոնի հետ բացառիկ հարցազրույցն այսօր կցուցադրվի «Մոամբե» լրատվական հաղորդման եթերում: