Եվրոպական խորհրդի նախագահ Շառլ Միշելը Ռուսաստանի նախագահ Վլադիմիր Պուտինի հետ հեռախոսազրույցում վերահաստատել է Եվրամիության աջակցությունը Վրաստանի և Ուկրաինայի տարածքային ամբողջականությանը:

Այս մասին գրում է Շառլ Միշելը՝ «Twitter» սոցիալական ցանցում:

Եվրոպական խորհրդի նախագահի խոսքով, Վլադիմիր Պուտինի հետ զրույցի ընթացքում նա քննարկել է Աֆղանստանում վերջին զարգացումները եւ դրանց ազդեցությունը տարածաշրջանի վրա:

Նա ասել է, որ ԵՄ-ն և Ռուսաստանը շահագրգռված են տարածաշրջանային կայունությամբ: Նա առաջնահերթություններ անվանեց հումանիտար աղետի կանխումը, ահաբեկչության դեմ պայքարը, թմրանյութերի շրջանառության դեմ պայքարը և մարդու իրավունքների պաշտպանությունը:

«Ես վերահաստատեցի ԵՄ-ի աջակցությունը Ուկրաինայի եւ Վրաստանի տարածքային ամբողջականությանը: Մենք կարծիքներ փոխանակեցինք Հայաստան-Ադրբեջան կարգավորման հեռանկարների՝ վստահության վերականգնման և երկխոսության անհրաժեշտության վերաբերյալ: Ես դատապարտում եմ Բելառուսի կողմից ապօրինի միգրացիայի օգտագործումը որպես զենք ԵՄ անդամ երկրների դեմ», – գրել է Շառլ Միշելը «Twitter»-ում:

Reiterated EU support to Ukraine’s and Georgia’s territorial integrity.

Exchanged views on prospects for the Armenia-Azerbaijan settlement – confidence building and dialogue are needed.

Condemned Belarus’s weaponisation of irregular migration against EU Member States.

— Charles Michel (@eucopresident) September 8, 2021