Եվրամիությունը, նրա թեկնածու երկրները և նույնիսկ Աֆրիկան ​​գտնվում են Կրեմլի հիբրիդային հարձակումների տակ, հայտարարել է Եվրոպական խորհրդի նախագահ Շառլ Միշելը Եվրամիության ընդլայնման 20-ամյակի կապակցությամբ կազմակերպված միջոցառմանը։

Ըստ Միշելի՝ Ռուսաստանը օգտագործում է միգրանտներին, փողերը և կեղծ լուրերը՝ ապակայունացնելու համար, քանի որ հստակ նպատակ ունի ոչնչացնել եվրոպական երազանքը։ Նրա խոսքով՝ դրա պատճառն այն է, որ Կրեմլը վախենում է իր դռան մոտ գտնվող ազատությունից ու ժողովրդավարությունից։

«Եվրամիությունը ազատության և հնարավորությունների ամենամեծ տարածքն է այս մոլորակի վրա։ Մենք աշխարհում դրական իմիջ ունենք։ Մեզ դիտում են որպես ազնիվ խաղացողների՝ առանց որևէ թաքնված օրակարգի կամ որևէ մեկի հետ աշխատելու ցանկության: Սա մեզ թույլ է տալիս դրական, հարգալից և կայունացնող դեր խաղալ համաշխարհային կառավարման մեջ: Բայց մենք պետք է խուսափենք երկակի ստանդարտների ծուղակից»,- ասել է Միշելը։

Եվրոպական խորհրդի նախագահի խոսքով, ընդլայնումը Եվրամիության ինքնիշխանության ռազմավարության հիմնաքարն է, և թեկնածու երկրներն ու Եվրամիության կառույցները մեծ աշխատանք ունեն անելու։

«Ես կրկնում եմ իմ հաստատակամ համոզմունքը, որ մենք պետք է պատրաստ լինենք երկու կողմից 2030 թվականի ընդլայնմանը։ Թեկնածու երկրների համար դա նշանակում է իրականացնել անհրաժեշտ բարեփոխումներ և լուծել բոլոր երկկողմ վեճերը։ Եվրամիության կողմից դա նշանակում է բարեփոխել մեր ծրագրերն ու բյուջեն ու որոշում կայացնել»,- ասել է Միշելը։