Որոշումների ժամանակն է, կոչ եմ անում բոլորիդ, եկեք գագաթնաժողովին փոխզիջման ոգով, հավաքական պատասխանատվության զգացումով, առաջ դնենք Եվրամիության շահերն ու արժեքները,- այս մասին ասված է Եվրոպական խորհրդի նախագահ Շառլ Միշելի նամակում, որը նա ուղարկել է Եվրամիության անդամ երկրների առաջնորդներին՝ նրանց գագաթնաժողովին հրավիրելու համար։

«Մեզ սպասում է Եվրոպական խորհրդի վճռական հանդիպումը։ Որոշումների ժամանակն է, կոչ եմ անում բոլորիդ, եկեք գագաթնաժողովին փոխզիջման ոգով, հավաքական պատասխանատվության զգացումով, առաջ դնենք Եվրամիության շահերն ու արժեքները։ Անհամբեր սպասում եմ ձեզ Բրյուսելում»,- իր նամակում գրել է Շառլ Միշելը։

Եվրախորհրդի նախագահը նշում է, որ Եվրամիությունը պետք է համաձայնի Ուկրաինայի հետ անդամակցության բանակցություններ սկսելու և անդամակցության մյուս դիմողների համար կարևոր որոշումներ կայացնելուն։

«2022 թվականի փետրվարի 21-ը շրջադարձային էր Եվրոպայի պատմության մեջ։ Մեր մայրցամաքում պատերազմի սկսվելուց ի վեր մենք մի քանի աննախադեպ որոշումներ ենք ընդունել՝ աջակցելու Ուկրաինային և միաժամանակ ամրապնդելու եվրոպական ինքնիշխանությունը։ 19 ամիս անց մենք դեռ կանգնած ենք համարձակ որոշումներ կայացնելու անհրաժեշտության առաջ։ Դա պահանջում է մեր հավաքական ուժն ու ամրությունը, ինչպես նաև քաջություն՝ ճիշտ ընտրություն կատարելու համար: Մենք պետք է կատարենք մեր պարտավորությունները Ուկրաինայի հանդեպ, շարունակենք մնալ հուսալի և ուժեղ գործընկեր։ Մենք պետք է շարունակենք կայուն քաղաքական, ֆինանսական և ռազմական աջակցություն ցուցաբերել Ուկրաինային և, մասնավորապես, համաձայնել 50 միլիարդ եվրո տրամադրել նրա երկարաժամկետ կայունության համար։ Մենք պետք է համաձայնվենք նաև Ուկրաինայի հետ անդամակցության բանակցություններ սկսելուն՝ անհրաժեշտ ազդանշան ուղարկելով նրան եվրոպական ընտանիքին մոտեցնելու համար։ Մենք նաև պետք է կարևոր որոշումներ կայացնենք անդամության այլ դիմորդների համար: Միևնույն ժամանակ, եկեք աշխատենք, որպեսզի մեր միությունը պատրաստ լինի ապագային և ողջունենք նոր անդամներին»,- ասված է Շառլ Միշելի նամակում։

Շառլ Միշելի խոսքով՝ գագաթնաժողովի օրակարգում կլինեն նաեւ Մերձավոր Արեւելքի ընթացիկ իրադարձությունները։