Վրաստանի խորհրդարանի նախագահ Շալվա Պապուաշվիլին որդու ու պատգամավորների հետ այցելել է Ուկրաինայի պատերազմի պատճառով Վրաստանում մնացած Ուկրաինայի քաղաքացիներին ու շնորհավորել նրանց Կանանց տոնի առթիվ։

Խորհրդարանի նախագահն ու պատգամավորները Ուկրաինայի քաղաքացիների հետ խոսել են ստեղծված իրավիճակի մասին և վերահաստատել իրենց ամուր աջակցությունն Ուկրաինային։

Շալվա Պապուաշվիլին և պատգամավորները Վրաստանի խորհրդարանի անունից խորհրդանշական նվերներ են հանձնել Ուկրաինայի քաղաքացիներին՝ նշելու կանանց օրը։

«Սա էմոցիոնալ հուզիչ օր է: Այս դժվարին ժամանակաշրջանում, խորհրդարանի կողմից, մենք ցանկանում էինք այսօր ավելի գեղեցիկ դարձնել կանանց և աղջիկների համար: Մենք փորձել ենք վերահաստատել և ցուցաբերել մեր աջակցությունը մեր բարեկամ ազգին թե՛ հոգեպես, թե՛ ֆիզիկապես՝ այս դժվարին շրջանը մեղմելու համար։ Մենք ամեն ինչ կանենք նրանց օգնելու համար։ Ես հուսով եմ, որ ուկրաինացի ժողովրդի նման վերաբերմունքով ամեն ինչ բարեհաջող կավարտվի, և խաղաղություն կլինի ողջ աշխարհում»,- ասել է խորհրդարանի պատգամավոր Խատիա Ծիլոսանին։

«Այսօրվա միջոցառումը Ուկրաինային Վրաստանի աջակցության խորհրդանշական արտահայտությունն է։ Մենք որոշեցինք այսօրվա տոնը՝ մարտի 8-ը, հնարավորինս գեղեցիկ դարձնել Վրաստանում գտնվող ուկրաինուհիների համար, նրանց գեղեցիկ պահեր պարգևել՝ չնայած Ռուսաստանի մղած պատերազմի պատճառով Ուկրաինայում ստեղծված ծանր իրավիճակին»,- ասել է Թամար Թալիաշվիլին։

Ուկրաինայում շարունակվող ռազմական գործողությունների պատճառով ընդհատված օդային չվերթների պատճառով Վրաստան ժամանած Ուկրաինայի քաղաքացիները չեն կարողանում վերադառնալ հայրենիք։ Նրանց տեղավորումը հյուրանոցում ապահովել է Վրաստանի կառավարությունը։

Տեղեկությունը տարածում է Վրաստանի խորհրդարանի մամուլի ծառայությունը։