Շալվա Պապուաշվիլին հանդիպել է Խորվաթիայի խորհրդարանի եվրոպական հարցերով հանձնաժողովի անդամների հետ
Վրաստանի խորհրդարանի նախագահ Շալվա Պապուաշվիլին հանդիպել է Խորվաթիայի Հանրապետության խորհրդարանի Եվրոպական հարցերի հանձնաժողովի նախագահ Դոմագոյ Հայդուկովիչի և հանձնաժողովի անդամների հետ։
Ինչպես հայտնում է Վրաստանի խորհրդարանի մամուլի ծառայությունը, հանդիպմանն ընդգծվել է Վրաստանի և Խորվաթիայի միջև երկկողմ համագործակցության ակտիվացման և խորացման անհրաժեշտությունը։ Ուշադրություն է դարձվել խորհրդարանական կապերի ամրապնդմանը։ Այս առումով դրական է գնահատվել Խորվաթիայում Վրաստանի դեսպանատուն բացելու որոշումը։
Շալվա Պապուաշվիլին խոսել է ԵՄ հանձնարարականների իրականացման հարցում Վրաստանի առաջընթացի մասին։
Խորվաթական կողմը վճռական աջակցություն է հայտնել Վրաստանի՝ Եվրամիությանն ինտեգրմանը և պատրաստակամություն հայտնել կիսվել Խորվաթիայի փորձով։