Վրաստանի խորհրդարանի նախագահ Շալվա Պապուաշվիլին հանդիպել է Սևծովյան տնտեսական համագործակցության կազմակերպության (BSEC) գլխավոր քարտուղար Լազար Կոմանեսկուին։

Լազար Կոմանեսկուն նշել է, որ BSEC-ի ստեղծման օրվանից Վրաստանը, որպես կազմակերպության հիմնադիր անդամներից մեկը, մշտապես ակտիվ մասնակցություն է ցուցաբերել և կարևոր ներդրում է ունեցել կազմակերպության գործունեության մեջ։

Հանդիպման ընթացքում ընդգծվել է ինչպես BSEC-ի, այնպես էլ կազմակերպության խորհրդարանական վեհաժողովի (PABSEC) շրջանակում Վրաստանի նախագահության նշանակությունը՝ որպես կազմակերպության հետագա զարգացման լավ հնարավորություն։

Լազար Կոմանեսկուն խոսել է BSEC-ի կողմից նոր նախագծերի պլանավորման և իրականացման մասին՝ այդ թվում բիզնես շրջանակների ներգրավման կարևորության, ինչպես նաև հնարավոր համատեղ գիտահետազոտական նախագծերի մասին, հատկապես փոխկապվածության ոլորտում։

Քննարկվել են նաև Վրաստանի նախագահության ընթացքում նախատեսված միջոցառումները։

Նշվել է, որ աշխարհը կանգնած է բազմաթիվ մարտահրավերների առջև, ձևավորվում է նոր համաշխարհային կարգ, և այս գործընթացում տարածաշրջանային համագործակցության ամրապնդումն առավել կարևոր է։

Հանդիպմանը մասնակցել է նաև Սևծովյան տնտեսական համագործակցության կազմակերպության խորհրդարանական վեհաժողովում (PABSEC) խորհրդարանական պատվիրակության ղեկավար Իրաքլի Մեզուրնիշվիլին։

Տեղեկությունը տարածել է Վրաստանի խորհրդարանի մամուլի ծառայությունը։