Շալվա Պապուաշվիլին հանդիպել է Գերմանիայի Բունդեսթագի Հարավային Կովկասի խորհրդարանական խմբի անդամների հետ
Վրաստանի խորհրդարանի նախագահ Շալվա Պապուաշվիլին հանդիպել է Գերմանիայի Դաշնային Հանրապետության Բունդեսթագի Հարավային Կովկասի խորհրդարանական խմբի անդամների հետ։
Հանդիպմանը հանգամանորեն խոսվել է Հարավային Կովկասի տարածաշրջանում ընթացող իրադարձությունների և անվտանգության ծանր իրավիճակի մասին։
Հարավային Կովկասի խորհրդարանական խմբի անդամները դրական են գնահատել Վրաստանի դերը տարածաշրջանային խաղաղության ապահովման գործում։
Զրույցի ընթացքում անդրադարձ է եղել նաև ուկրաինական պատերազմին և տարածաշրջանի համար դրա հետևանքներին։
Շալվա Պապուաշվիլին խոսել է Վրաստանի ջանքերի մասին՝ մինչև տարեվերջ ավարտին հասցնել ԵՄ 12 հանձնարարականների կատարումը և ընդգծել Գերմանիայի աջակցության կարևորությունը։
Այցի շրջանակներում Վրաստանի խորհրդարանի պատվիրակությունը՝ խորհրդարանի նախագահ Շալվա Պապուաշվիլիի գլխավորությամբ, երկկողմ հանդիպումներ է անցկացնում Գերմանիայի մայրաքաղաքում քաղաքական բարձրաստիճան պաշտոնյաների հետ։
Տեղեկությունը տարածում է Վրաստանի խորհրդարանի մամուլի ծառայությունը։