Շալվա Պապուաշվիլին հանդիպել է Դանիայի Թագավորության խորհրդարանի նախագահին
Վրաստանի խորհրդարանի նախագահ Շալվա Պապուաշվիլին հանդիպել է Դանիայի Թագավորության խորհրդարանի նախագահ Հենրիկ Դեմի հետ։
Վրաստանի խորհրդարանի մամուլի ծառայությունից հայտնում են, որ կողմերը քննարկել են Վրաստանի և Դանիայի Թագավորության միջև երկկողմ և բազմակողմ համագործակցությունը։ Նրանց խոսքով, ընդգծվել է խորհրդարանական կապերի խորացման կարեւորությունը։
Շալվա Պապուաշվիլին կենտրոնացել է նաև երկու երկրների համագործակցության վրա և երախտագիտություն հայտնել Վրաստանում ժողովրդավարության և պետական ինստիտուտների կառուցման գործում Դանիայի Թագավորության ներդրման համար։
Խորհրդարանի նախագահը ողջունել է Դանիայի Թագավորության՝ Վրաստանում դեսպանություն բացելու որոշումը։ Նրա խոսքով, այս քայլը զգալիորեն կնպաստի երկու երկրների համագործակցությանը։
Վրաստանի խորհրդարանի նախագահը մանրամասն անդրադարձել է եվրաինտեգրման ճանապարհին Վրաստանի ձեռնարկած քայլերին և իրականացվող բարեփոխումներին։ Շալվա Պապուաշվիլին հույս է հայտնել, որ Դանիայի Թագավորությունը կաջակցի Վրաստանին, Ուկրաինային և Մոլդովային թեկնածուի կարգավիճակ տրամադրելու հարցում։ Հանդիպմանը քննարկվել է նաև Ուկրաինայում ռուսական ագրեսիան և դրա հետևանքները։
Շարունակվում է Վրաստանի խորհրդարանի նախագահի պաշտոնական այցը սկանդինավյան երկրներ։ Խորհրդարանական պատվիրակության կազմում են պատգամավորներ՝ Նիկոլոզ Սամխարաձեն, Մակա Բոճորիշվիլին, Մայա Բիթաձեն և Հերման Սաբոն։