Շալվա Պապուաշվիլի – Եվրոպայի խորհրդարանի լիտվացի պատգամավոր Ռասա Յուկնևիչենեի հայտարարությունները արդեն շատ մոտ են ֆաշիստական հայտարարությունների շեմին
Վրաստանի խորհրդարանի նախագահ Շալվա Պապուաշվիլին գրում է, որ Եվրոպայի խորհրդարանի լիտվացի պատգամավոր Ռասա Յուկնևիչենեի հայտարարություններն արդեն շատ մոտ են ֆաշիստական հայտարարությունների շեմին։
Պապուաշվիլու խոսքով՝ ժամանակն է, որ Բրյուսելում ի հայտ գա ողջախոհ միտք, որը կկասեցնի այս տենդենցը, որը դեմ է ժողովրդավարությանը և մարդկային արժանապատվությանը։
«Եվրոպայի խորհրդարանի լիտվացի պատգամավոր Ռասա Յուկնևիչենեի հայտարարությունները շատ մոտեցել են ֆաշիստական հայտարարությունների շեմին։ «Մեղավոր է ժողովուրդը…», «Պետք է կանգնեցնենք վարակը…» – եթե նայենք նրա կողմից խրախուսվող ռադիկալների ատելության լեզվի զարգացման ուղուն, ապա հաջորդ անգամ, ըստ տրամաբանության, վրաց ժողովրդին պիտի անվանեն «ծառա» կամ «բիոմասա»… Ժամանակն է, որ Բրյուսելում ի հայտ գա ողջախոհ միտք, որը կկասեցնի այս ամոթալի տենդենցը, որը դեմ է ժողովրդավարությանը և մարդկային արժանապատվությանը։ Իսկ Ռասա Յուկնևիչենեին կասեի – չի կարելի Ստալինի հանդեպ ատելությամբ ամբողջ ազգին ատել», – գրել է Պապուաշվիլին։
Հիշեցնենք, որ եվրոպարլամենտի պատգամավոր Ռասա Յուկնևիչենեն Վալենսիայում՝ «Եվրոպայի ժողովրդական կուսակցության» համագումարում իր ելույթի ժամանակ հայտարարել է․
«Վրաստանում գործող ռեժիմը հաջողված օրինակ է՝ թե ինչպես է Կրեմլը ներսից հափշտակել պետությունը, և դա կարող է պատահել նաև ԵՄ անդամ երկրին, եթե մենք այս վարակը ժամանակին չկանգնեցնենք»։