Վրաստանի խորհրդարանի նախագահ Շալվա Պապուաշվիլիի խոսքով՝ Վրաստանի կառավարությունն ուսումնասիրում է Ուկրաինային մարդասիրական օգնության կարիքները և կապահովի դրա առաքումը ըստ պահանջի։

Պապուաշվիլիի խոսքով՝ Վրաստանի իշխանությունը վերջին օրերին մեր ռազմավարական գործընկերների հետ համաձայնեցված ամբողջությամբ ներգրավված է Ուկրաինայում պատերազմը կանխելու գործում, իսկ այժմ՝ պատերազմը դադարեցնելու գործում։

«Մեր հասարակությանը հիշեցնեմ, որ

1. Վրաստանի խորհրդարանն աշխարհում երկրորդ խորհրդարանն էր, որը բանաձեւ ընդունեց ի պաշտպանություն Ուկրաինայի։

2. Վրաստանն օգտագործում է բոլոր միջազգային հարթակները (ՄԱԿ, ԵԱՀԿ, Եվրոպայի խորհուրդ, ԵՄ ձևաչափեր)՝ Ուկրաինային միջազգային հանրության աջակցությունն ապահովելու և պատերազմը դադարեցնելու արդյունավետ միջոցներ ձեռնարկելու համար։ Միայն վերջին երեք օրերի ընթացքում Վրաստանի խորհրդարանի արտաքին հարաբերությունների կոմիտեի նախագահ Նիկոլոզ Սամխարաձեն Վիեննայում մասնակցեց ԵԱՀԿ խորհրդարանական վեհաժողովին։ Պաշտպանության կոմիտեի նախագահ Իրակլի Բերայան մասնակցել է ՆԱՏՕ-ի խորհրդարանական վեհաժողովին, Եվրոպական ինտեգրման կոմիտեի նախագահ Մակա Բոճորիշվիլին՝ Եվրանեսթի խորհրդարանական վեհաժողովին։ Այս բոլոր ձևաչափերով քննարկումները, անշուշտ, վերաբերում էին Ուկրաինային և տարածաշրջանային անվտանգության խնդիրներին։

3. Ուկրաինայում Վրաստանի դեսպանը և հյուպատոսը դեռ Կիևում են, շեշտում եմ՝ նրանք դեռ Կիևում են և կապի մեջ են Ուկրաինայի իշխանության և Ուկրաինայում Վրաստանի քաղաքացիների հետ։

4. Վրաստանի կառավարությունը, Վրաստանում Ուկրաինայի դեսպանատան հետ սերտ համագործակցությամբ, սկսել է Վրաստանում մնացած Ուկրաինայի քաղաքացիներին հյուրանոցներում տեղավորել օդային երթեւեկության խափանման պատճառով։

5. Վրաստանի կառավարությունը ուսումնասիրում է Ուկրաինային մարդասիրական օգնության կարիքները և կապահովի դրա մատակարարումը ըստ պահանջի: