Սարսափելի փաստ է տեղի ունեցել Կիրբալի գյուղի մոտ, որտեղ ռուսական օկուպացիոն ուժերի ներկայացուցիչը սպանել է Վրաստանի քաղաքացի Թամազ Գինտուրիին։Ցավակցում եմ Թամազ Գինտուրիի ընտանիքին և մտերիմներին,- այս մասին ֆեյսբուքյան գրառման մեջ գրել է խորհրդարանի նախագահ Շալվա Պապուաշվիլին։

«Այս ողբերգությունը ևս մեկ անգամ ապացուցում է, որ օկուպացիան ամեն օր ծանր հետևանքներ է թողնում և վտանգներ է պարունակում օկուպացիոն գծի մոտ ապրող մարդկանց և ընդհանրապես պետության համար։

Վրաստանի կառավարությունը ձեռնարկում է բոլոր միջոցները՝ ապօրինի ձերբակալված ևս մեկ քաղաքացու ազատ արձակելու և մեղավորին պատժելու համար։

Կոչ եմ անում միջազգային գործընկերներին ժամանակին գնահատել նշված փաստը և ուժեղացնել ճնշումը Ռուսաստանի վրա՝ օկուպացիային վերջ տալու համար»,- գրել է Պապուաշվիլին սոցցանցում։

Վրաստանի Պետական ​​անվտանգության ծառայությունը տեղեկություն է տարածել, որ Կիրբալի գյուղի մերձակայքում օկուպացված տարածքում տեղի բնակչին ապօրինի ձերբակալելու փորձի ժամանակ ռուսական օկուպացիոն ուժերի կրակոցների հետևանքով Վրաստանի քաղաքացի է մահացել, իսկ մեկ քաղաքացի անօրինական կերպով ձերբակալվել է։