Ռուսաստանը չի պատրաստվում որևէ մեկի հետ խոսել Վլադիմիր Զելենսկիի առաջարկած «խաղաղության բանաձեւի» հիման վրա, պարզ է, որ Կիևն ինքը պատրաստ չէ երկխոսության,- հայտարարել է ՌԴ ԱԳ նախարար Սերգեյ Լավրովը։

ՌԴ ԱԳՆ ղեկավարի խոսքով՝ Ուկրաինայի նախագահը պատրանք ունի հասնել Դոնբասից, Ղրիմից, ինչպես նաև Զապոռոժյեի և Խերսոնի շրջաններից ռուսական զորքերի դուրսբերմանը Արևմուտքի օգնությամբ։

Լավրովի խոսքով՝ Մոսկվան չի հրաժարվում հակամարտության դիվանագիտական ​​լուծման գաղափարից, սակայն այժմ դժվար է ասել՝ արդյոք Ուկրաինայում կան ադեկվատ քաղաքական գործիչներ։

«Հատուկ ռազմական գործողության մեկնարկի պահից Վլադիմիր Զելենսկին նախաձեռնեց նստել բանակցությունների սեղանի շուրջ։ Մենք չհրաժարվեցինք և պայմանավորվեցինք հանդիպել նրա ներկայացուցիչների հետ։ Բանակցությունների մի քանի փուլերը ցույց են տվել, որ կարելի է ձեռք բերել փոխընդունելի պայմանավորվածություններ։ Այնուամենայնիվ, փետրվարին սկսված բանակցային գործընթացը ցույց տվեց Զելենսկու անկախության իսպառ բացակայությունը կարևոր որոշումներ կայացնելու հարցում։ Արդեն ապրիլին անգլո-սաքսոնների թելադրանքով, որոնք շահագրգռված էին ռազմական գործողությունների շարունակմամբ, նա արագ դադարեցրեց բանակցությունները և կտրուկ կոշտացրեց իր դիրքորոշումը»,- նշել է Սերգեյ Լավրովը։