Սաուդյան Արաբիայի արքայազնը կայցելի Հունաստան՝ համաձայնագրեր ստորագրելու էներգետիկ և ռազմական ոլորտներում

Սաուդյան Արաբիայի արքայազն Մուհամեդ բեն Սալմանը հուլիսի 26-ին կայցելի Հունաստան և հանդիպում կունենա այս երկրի վարչապետ Կիրիակոս Միցոտակիսի հետ։ Այդ մասին հայտնում է «Reuters»-ը։

Բեն Սալմանի ծրագրված այցը Հունաստան կլինի նրա առաջին այցը ԵՄ երկիր 2018 թվականին սաուդցի լրագրող Ջամալ Խաշոգի սպանությունից հետո։

Հունաստանի արտաքին գործերի նախարարության տեղեկատվության համաձայն՝ կողմերի միջեւ պետք է երկկողմանի պայմանագրեր ստորագրվեն։ Ըստ հունական դիվանագիտական ​​աղբյուրի, գործարքները կվերաբերեն էներգետիկ, ռազմական հարցերին:

Հունաստանը և Սաուդյան Արաբիան մայիսին պայմանավորվել են համատեղ ձեռնարկություն ստեղծել տվյալների մալուխի կառուցման համար, որը կմիացնի Եվրոպան Ասիայի հետ: