«Պատվաստվենք միմյանց համար» համընդհանուր պատվաստումների արշավի շրջանակներում Վրաստանի տարբեր շրջաններում պատվաստումների աջակցության տեղեկատվական հանդիպումներին, որոնք կազմակերպվել են օկուպացված տարածքներից փախստականների, աշխատանքի, առողջապահության և սոցիալական հարցերի նախարարության և Հիվանդությունների վերահսկման և հանրային առողջության ազգային կենտրոնի կողմից, միացել են միջազգային դոնորները: Այդ մասին տեղեկություն է տարածում առողջապահության նախարարությունը։

Գերատեսչության տվյալներով՝ արշավի շրջանակներում Համաշխարհային բանկի և USAID-ի աջակցությամբ տեղեկատվական համայնքային հանդիպումներ են անցկացվում Սամցխե-Ջավախքի տարածաշրջանի տարբեր գյուղերի բնակիչների հետ։

«Հանդիպումների հիմնական նպատակն է բարձրացնել տեղի բնակչության իրազեկությունը իմունիզացիայի կարևորության և անհրաժեշտության, պատվաստանյութերի անվտանգության և Covid 19-ից բխող վտանգների մասին։ Հանդիպումները վարում են ոլորտի որակյալ մասնագետներ, գյուղի բժիշկներ, Առողջապահության և հիվանդությունների վերահսկման կենտրոնի ներկայացուցիչներ, գյուղի լիազորներ, տեղական ինքնակառավարման մարմինների ներկայացուցիչներ և այլ շահագրգիռ կողմեր։

Տեղեկատվական հանդիպումները ներառում են Սամցխե-Ջավախքի տարածաշրջանի տասը գյուղեր՝ Ջիգրաշեն, Դիդի Գոնդուրա, Հեշտիա, Գորելովկա, Խանչալի, Օկամի, Գոգաշեն, Արագվա, Տուրցխ և Բարալեթի: Յուրաքանչյուր միջոցառում նախատեսված է մինչև 30 տեղաբնակների համար, և հիմնական թիրախային լսարանը ռիսկային խմբի մարդիկ են՝ 60 տարեկանից բարձր: Հանդիպումների ավարտին իմունականխարգելմամբ հետաքրքրված մասնակիցները հնարավորություն ունեն տեղում պատվաստվել իրենց նախընտրած պատվաստանյութով։ Բնակչության պատվաստման համար Թբիլիսիից Սամցխե-Ջավախք է մեկնել լիովին կահավորված շարժական ամբուլատորիա, որը տրամադրել է Վրաստանի բժշկական հոլդինգը։

Արծվիկ Պողոսյանը Ջիգրաշենի գյուղի բնակիչ է, ով որոշել է պատվաստանյութի երկրորդ դեղաչափն ստանալ հանդիպումից անմիջապես հետո։

«Ինձ համար առաջին հերթին կարևոր է պատվաստումը, քանի որ նախորդ տարի վարակվել եմ և անհրաժեշտ եմ համարել պատվաստվել։ Օգոստոսի 27-ին ես ընդունեցի Սինոֆարմ առաջին դեղաչափը, հաջորդ օրը թեթև ալերգիա ունեցա, վախեցա, հետո խուսափեցի, սակայն այսօրվա հանդիպումից հետո որոշում կայացրեցի և պատվաստվեցի Սինոֆարմով: Գյուղում մարդիկ վախենում են պատվաստվել ապատեղեկատվության պատճառով, ես բոլորին խորհուրդ եմ տալիս պատվաստվել»,- ասաց տեղացիներից մեկը։

Այսօր Նինոծմինդայի գյուղերում հանդիպումներ կանցկացվեն, իսկ նոյեմբերի 26-ին Ախալքալաքի գյուղերի բնակիչները կկարողանան տեղեկություններ ստանալ պատվաստումների հետ կապված և ներգրավվել տեղական պատվաստումների գործընթացին։