Վրաստանի նախագահ Սալոմե Զուրաբիշվիլին հանդիպել է Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Խավիեր Կոլոմինայի հետ։
Հանդիպման ընթացքում անդրադարձ է եղել երկրի եվրաատլանտյան ինտեգրմանը, Վրաստանին ԵՄ անդամակցության թեկնածուի կարգավիճակ շնորհելուն, ՆԱՏՕ-Վրաստան հարաբերություններին, Վրաստանում 2024 թվականին նախատեսված ընտրություններին։
Խավիեր Կոլոմինան անձամբ է շնորհավորել Վրաստանի նախագահին՝ Վրաստանին ԵՄ անդամակցության թեկնածուի կարգավիճակ շնորհելու կապակցությամբ։
ՆԱՏՕ-ի գլխավոր քարտուղարի հատուկ ներկայացուցիչն ընդգծել է երկրի եվրաինտեգրման գործընթացում պետական կառույցների ակտիվ ներգրավվածության, ինչպես նաև ինստիտուցիոնալ և ժողովրդավարական բարեփոխումների իրականացման կարևորությունը։
Հանդիպման ընթացքում նշվել է, որ նախատեսված խորհրդարանական ընտրությունների տեսանկյունից հաջորդ տարին էլ ավելի կարևոր է երկրի համար, որպեսզի ընտրություններն անցկացվեն ժողովրդավարական և արդար միջավայրում։
ՆԱՏՕ-ի գլխավոր քարտուղարի հատուկ ներկայացուցիչը ևս մեկ անգամ հաստատել է իր անսասան աջակցությունը Վրաստանի ինքնիշխանությանն ու տարածքային ամբողջականությանը։
Վրաստանի նախագահը հյուրին տեղեկացրել է սողացող օկուպացիայի և օկուպացված տարածքներում առկա իրավիճակի մասին, որը կապված է Վրաստանի քաղաքացիների սպանությունների և մարդու իրավունքների ոտնահարման հետ, որին միջազգային հանրությունը պետք է խստորեն արձագանքի։
Հանդիպման ընթացքում կողմերը քննարկել են ՆԱՏՕ-Վրաստան հարաբերությունների ամրապնդման ու զարգացման հարցեր։ Նշվել է, որ հաջորդ տարի Վաշինգտոնում նախատեսված ՆԱՏՕ-ի հոբելյանական գագաթնաժողովին Վրաստանի համար կարևոր է ամենաբարձր մակարդակով ներկայացված լինելը։
Տեղեկությունը տարածում է Վրաստանի նախագահի վարչակազմը։