Ռուսական պետական լրատվամիջոցների փոխանցմամբ՝ Սերգեյ Շոյգուն Վլադիմիր Պուտինին տեղեկացրել է Մարիուպոլի «ազատագրման» մասին, իսկ Պուտինը հրամայել է չեղարկել «Ազովստալ» արդյունաբերական գոտու գրոհը
Ռուսաստանի նախագահ Վլադիմիր Պուտինը հրամայել է չեղարկել հարձակումը Մարիուպոլի «Ազովստալ» գործարանի վրա։ Այս մասին տեղեկություն է տարածում ռուսական պետական լրատվամիջոցը։
«Tass» լրատվական գործակալության փոխանցմամբ՝ Պուտինը հարձակումն անվանել է ոչ նպատակահարմար։ Նա պահանջել է արգելափակել «Ազովստալ» արդյունաբերական գոտին, որպեսզի «ճանճը չկարողանա թռչել»։ Նա բացատրել է հարձակման չեղարկումը ռուս զինվորականների կյանքը փրկելու համար։
«Սա այն դեպքն է, երբ մենք պետք է մտածենք, մենք միշտ պետք է մտածենք, բայց հատկապես այս պահին, հատկապես պաշտպանելու մեր զինվորների ու սպաների կյանքն ու առողջությունը։ Կարիք չկա այս կատակոմբներ մտնել։ Արգելափակեք այս արդյունաբերական գոտին, որպեսզի ճանճը չկարողանա թռչել: Եվս մեկ անգամ առաջարկեք բոլորին, ովքեր դեռ չեն վայր դրել իրենց զենքերը, անեն դա: Ռուսական կողմը երաշխավորում է նրանց կյանքը և արժանապատիվ վերաբերմունքը՝ համապատասխան միջազգային իրավական ակտերի համաձայն։ Բոլոր վիրավորներին կտրամադրվի որակյալ բժշկական օգնություն»,- ասել է Պուտինը։
Ռուսական պետական լրատվամիջոցների փոխանցմամբ՝ ավելի վաղ ՌԴ պաշտպանության նախարար Սերգեյ Շոյգուն Պուտինին տեղեկացրել էր Մարիուպոլի «ազատագրման» մասին։ Շոյգուի խոսքով՝ «Ազովստալի» տարածքում արգելափակված է ավելի քան 2000 մարտիկ։ Միաժամանակ ՌԴ պաշտպանության նախարարը հայտնել է, որ ռուսական ուժերին երեք-չորս օր է անհրաժեշտ «Ազովստալի» աշխատանքներն ավարտելու համար։
«Ներկայումս քաղաքում իրավիճակը հանգիստ է, դա թույլ է տալիս սկսել կարգուկանոն հաստատել, վերադարձնել բնակչությանը և կարգավորել խաղաղ կյանքը։ Ինչ վերաբերում է նրանց, ովքեր թաքնվում են «Ազովստալ» գործարանում և հիմնովին արգելափակված են այնտեղ, մեզ մոտ երեք-չորս օր կպահանջվի «Ազովստալում» աշխատանքներն ավարտելու համար», – ասել է Շոյգուն:
Շոյգուի խոսքով՝ ռուսական զինված ուժերը ներկայումս վերահսկում են Մարիուպոլի ողջ շրջանը, իսկ մարտիկները ապահով արգելափակված են «Ազովստալ» գործարանի տարածքում։