Ռումինիայի զինվորականները Սև ծովում «Գերբերա» տեսակի երկու անօդաչու թռչող սարք են ոչնչացրել
Ռումինիայի զինվորականները Սև ծովում «Գերբերա» տեսակի երկու անօդաչու թռչող սարք են ոչնչացրել, որոնք շարժվում էին Neptun Deep խորջրյա բնական գազի նախագծի հարևանությամբ։
Այս մասին հայտարարել է Ռումինիայի պաշտպանության նախարարի պաշտոնակատար Ռադու Միրուցեն։
Ափամերձ պահպանության ծառայության մասնագետները երկու անօդաչու թռչող սարքերը ոչնչացրել են Կոնստանցա քաղաքից մոտավորապես 90 ծովային մղոն հեռավորության վրա։
«Պաշտպանության նախարարությունը կապ է հաստատել ուկրաինացի գործընկերների հետ, որոնք հաստատել են, որ այդ համակարգերը իրենց չեն պատկանում», – նշել է Ռադու Միրուցեն։
Նավագնացության անվտանգության և հարթակի պաշտպանության նպատակով Ռումինիան որոշել է անօդաչու սարքերը ոչնչացնել պայթեցման ճանապարհով։
Ի գիտություն՝ «Գերբերա» տեսակի անօդաչու թռչող սարքը արտադրվում է Ռուսաստանում և, սովորաբար, օգտագործվում է հետախուզության կամ հակառակորդի պաշտպանությունը ստուգելու համար։