Ռումինիայում հաստատում են, որ Ռուսաստանի կողմից Ուկրաինայի տարածքի ուղղությամբ արձակված անօդաչու թռչող սարքի բեկորներն ընկել են Ռումինիայի տարածքում։ Այս մասին հայտարարել է Ռումինիայի պաշտպանության նախարարը։ Ինչպես լրագրողների հետ զրույցում հաստատել է Անխել Թիլվարը, մասնագետները ռումինական Պլաուրի բնակավայրի մոտ հայտնաբերել են ռուսական անօդաչու թռչող սարքի մասերի բեկորներ։

Տեղեկության համար, սկզբում Բուխարեստում կտրականապես հերքում էին, որ ռուսական անօդաչու թռչող սարքը կործանվել է Ռումինիայի տարածքում։

«Մենք տեսնում ենք, որ շատ կարճ ժամանակահատվածում ռուսական հարձակումների շարք է եղել՝ ուղղված ուկրաինական նավահանգստային ենթակառուցվածքների և պահեստների դեմ։ Կարծում եմ՝ պետք է ավելի զգոն լինել։ Մենք կունենանք ավելի շատ դիտակետեր, կունենանք ավելի շատ պարեկներ»,- ասել է Ռումինիայի պաշտպանության նախարարը։

Սեպտեմբերի 4-ին Ուկրաինայի արտաքին գործերի նախարարությունը հայտարարեց, որ ուկրաինական նավահանգիստների վրա ռուսական հարձակման ժամանակ ռուսական անօդաչու թռչող սարքեր են ընկել Ռումինիայի տարածքում։