Մեքսիկան դատապարտել է Վենեսուելայում իրականացված գործողությունը, սակայն Մեխիկոն մոտենում է Վաշինգտոնին՝ ԱՄՆ ագրեսիայի վախի պատճառով, հաղորդում է Ռոյթերսը։

Ռոյթերսի հաղորդմամբ, անվտանգության վերլուծաբանները նշում են, որ Մեքսիկայի նախագահ Կլաուդիա Շեյնբաումի կողմից հարձակման խստորեն դատապարտումը ենթադրում է, որ նա չի հանդուրժի Մեքսիկայում թմրանյութերի ապօրինի շրջանառության դեմ նմանատիպ գործողություններ։

«Մենք կտրականապես մերժում ենք այլ երկրների ներքին գործերին միջամտությունը։ Լատինական Ամերիկայի պատմությունը հստակ է և համոզիչ. միջամտությունը երբեք չի բերել ժողովրդավարություն, երբեք չի ստեղծել բարգավաճում կամ երկարատև կայունություն», – ասել է Շեյնբաումը։

Մասնագետները նշում են, որ Վենեսուելայում հարձակումից հետո Մեքսիկան, հավանաբար, կմերձենա Վաշինգտոնին՝ հույս ունենալով, որ երկկողմանի անվտանգության համագործակցությունը կկանխի ԱՄՆ ագրեսիան։

«Անվտանգության ոլորտում համատեղ համագործակցության ընդլայնումը և Մեքսիկայի պայքարը կարտելների դեմ ամրապնդելը կարևորագույն նշանակություն կունենան ԱՄՆ միակողմանի ռազմական միջամտությունից խուսափելու համար», – ասել է մեքսիկացի անվտանգության պաշտոնյան, որը լրատվամիջոցների հետ զրուցել է անանունության պայմանով։