Reuters. Լեհաստանում՝ Բելառուսի և Ռուսաստանի սահմանի մոտ ՆԱՏՕ-ի զորավարժություններ են անցկացվել
Լեհաստանում՝ Բելառուսի և Ռուսաստանի սահմանի մոտ ՆԱՏՕ-ի զորավարժություններ են անցկացվել։
Ինչպես գրում է «Reuters»-ը, զորավարժություններն անցկացվել են Հյուսիսատլանտյան դաշինքի համար ռազմավարական նշանակություն ունեցող Սուվալկի միջանցքի տարածքում։ Սուվալկի միջանցքը միացնում է Լեհաստանն ու Լիտվան՝ միևնույն ժամանակ բաժանելով Ռուսաստանի Կալինինգրադի մարզն ու Բելառուսը։
Զորավարժությանը մասնակցել է ցամաքային և օդային ուժերի երկու հազար զինվոր։ Զորավարժություններին ներգրավվել է հազար միավոր մարտական և նյութատեխնիկական տեխնիկա։ Զորավարժություններին մասնակցել է Լեհաստանի պաշտպանության նախարար Մարիուշ Բլաշչակը։
«Մենք վարժանքներ ենք անցնում, որոնք կապված են մեր զինվորականների ընթացիկ խնդիրների հետ։ Այս զորավարժությունները հիմնված են մեր փորձի վրա և հաշվի առնելով նաև Ուկրաինայի մարտադաշտում տիրող իրավիճակը։ Մենք գիտենք, թե ինչ մեթոդներ է կիրառում Ռուսաստանը և ինչ մեթոդներ է կիրառում ուկրաինական բանակը արդյունավետ պաշտպանության համար»,- ասել է Մարիուշ Բլաշչակը։