Ռեջեփ Թայիփ Էրդողանը Իրան այցի ընթացքում կհանդիպի Վլադիմիր Պուտինի հետ
Թուրքիայի նախագահ Ռեջեփ Թայիփ Էրդողանը Իրանում հանդիպում կունենա Վլադիմիր Պուտինի հետ։ Տեղեկությունը տարածում է Թուրքիայի նախագահի վարչակազմը։
Նրանց տվյալներով՝ Թուրքիայի ղեկավարը Իրանի նախագահ Էբրահիմ Ռայիսի հրավերով հուլիսի 18-19-ը կայցելի Թեհրան, որտեղ կմասնակցի Աստանայի ձևաչափի 7-րդ եռակողմ հանդիպմանը։ Թուրքիայի և Իրանի նախագահների հետ հանդիպմանը կմասնակցի նաև Ռուսաստանի նախագահը։
Վարչակազմի տվյալներով՝ եռակողմ հանդիպմանը կքննարկվեն Սիրիայում տեղի ունեցող իրադարձությունները, ինչպես նաև ահաբեկչական կազմակերպությունների, հատկապես PKK/YPG-ի և ԴԱԻՇ-ի դեմ պայքարը, հումանիտար հարցեր։
Ինչպես գրում է նախագահի վարչակազմը, գագաթնաժողովի շրջանակներում նախատեսվում է Ռուսաստանի և Թուրքիայի նախագահների առանձին հանդիպում։