Նախիջեւանի Ինքնավար Հանրապետությունում ավարտվել են Ադրբեջանի եւ Թուրքիայի ղեկավարների միջեւ բանակցությունները։ Թուրքական լրատվամիջոցների փոխանցմամբ՝ Ռեջեփ Թայիփ Էրդողանն ասել է, որ Ղարաբաղում տեղի ունեցող զարգացումների արդյունքում տարածաշրջանում լիարժեք կարգավորման հնարավորություն է ստեղծվել։ Էրդողանը նաև ասել է, որ Թուրքիան և Ադրբեջանը Հայաստանից ակնկալում են անկեղծ քայլեր։

«Մենք ակնկալում ենք, որ Հայաստանը կպատասխանի խաղաղության մեկնած ձեռքին և կձեռնարկի անկեղծ քայլեր»,- ասել է Էրդողանը։

Իր հերթին Ադրբեջանի նախագահն ասել է, որ վստահ է ղարաբաղցի հայերի վերաինտեգրման գործընթացի հաջողության մեջ։

«Մի քանի օր առաջ Եվլախ քաղաքում տեղի ունեցավ ղարաբաղահայության և Ադրբեջանի պետական ​​կառույցների ներկայացուցիչների հանդիպումը։ Այսօր ընթանում է երկրորդ հանդիպումը։ Ես դեռ տեղեկատվություն չեմ ստացել արդյունքների մասին, բայց վստահ եմ, որ Ղարաբաղի հայ բնակչության ինտեգրումն ադրբեջանական հասարակությանը հաջողությամբ կշարունակվի», – ասել է Ալիևը։

Բանակցությունների ընթացքում Թուրքիայի նախագահը ուշադրություն է հրավիրել նաև Իգդիրի-Նախիջևան գազատարի նախագծի վրա։ Էրդողանի խոսքով՝ «այս նախաձեռնությունը կամրապնդի Ադրբեջանի հետ էներգետիկ ոլորտում համագործակցությունը եւ կնպաստի Եվրոպայի էներգետիկ անվտանգությանը»։