Իսրայելի հետ աճող լարվածության ֆոնին Թուրքիան կանգնած է Լիբանանի կողքին, հայտարարել է Թուրքիայի նախագահ Ռեջեփ Թայիփ Էրդողանը իշխող «Օրենք և արդարություն» կուսակցության պատգամավորների առաջ ելույթում։

Էրդողանը կոչ է անում տարածաշրջանի երկրներին աջակցել Լիբանանին։

«Թուրքիան կանգնած է Լիբանանի եղբայրական ժողովրդի և պետության կողքին։ Տարածաշրջանի մյուս երկրներին կոչ եմ անում համերաշխություն հայտնել Լիբանանին»,- ասել է Ռեջեփ Թայիփ Էրդողանը։

Թուրք առաջնորդի խոսքով՝ Իսրայելի վարչապետ Բենիամին Նեթանյահուն ծրագրում է Գազայում շարունակվող պատերազմը տարածել տարածաշրջանով, ինչը, ըստ Էրդողանի, մեծ աղետի կհանգեցնի։ Նրա գնահատմամբ՝ Արեւմուտքի աջակցությունն Իսրայելին «ողորմելի» է։

«Կարծես Գազայի ավերումից ու այրումից հետո Իսրայելն այժմ իր հայացքն ուղղել է Լիբանանին։ Մենք տեսնում ենք, որ արևմտյան երկրները կուլիսներում աջակցում են Իսրայելին։ Տարածաշրջանում պատերազմ սփռելու Նեթանյահուի ծրագիրը մեծ աղետի կհանգեցնի»,- ասել է Էրդողանը։

Տեղեկության համար, այս շաբաթվա սկզբին Թուրքիայի արտաքին գործերի նախարար Հաքան Ֆիդանը, խոսելով Իսրայելի և Հըզբոլլահի միջև լարվածության մասին, ասել էր, որ Թուրքիան տեսնում է հակամարտության տարածման վտանգը։