Ռեջեփ Թայիփ Էրդողան. «Հացահատիկային համաձայնագրի» նորացման հետ կապված լավ արդյունք շուտով ձեռք կբերվի
Սևծովյան «հացահատիկի համաձայնագրի» նորացման հետ կապված լավ արդյունքը, որը կբավարարի անհրաժեշտ ակնկալիքները, շուտով ձեռք կբերվի,- ասել է Թուրքիայի նախագահ Ռեջեփ Թայիփ Էրդողանը։
Թուրքիայի նախագահի խոսքով՝ նախաձեռնության վերականգնումը առաջնահերթություն է ողջ աշխարհի համար, և Անկարան սերտ կապի մեջ է ՄԱԿ-ի հետ։ Էրդողանի խոսքով՝ այս ամսվա վերջին նա ՄԱԿ-ի գլխավոր քարտուղար Անտոնիո Գուտերեշի հետ կքննարկի սեւծովյան հացահատիկի համաձայնագիրը։
«Մեր ներդրման արդյունքում ՄԱԿ-ը պատրաստել է նոր փաթեթ, որը ճանապարհ կհարթի նախաձեռնության վերածննդի համար։ Մոսկվա կատարած այցի ընթացքում (Թուրքիայի) արտգործնախարարը ռուս գործընկեր Լավրովի հետ քննարկել է առաջարկների նոր փաթեթի տեխնիկական կողմը։ Ռուսաստանն ունի երկու պահանջ. առաջինը՝ Ռուսաստանի Ագրարային բանկի ներառումը SWIFT (միջազգային բանկային) համակարգում. երկրորդ՝ փոխադրման համար օգտագործվող նավերը պետք է ապահովագրված լինեն։ Եվրոպական կամ այլ նավահանգիստներ բեռնափոխադրող նավերը պետք է ապահովագրված լինեն»,- ասել է Ռեջեփ Թայիփ Էրդողանը։