Թաթարստանի Հանրապետության Պետական ​​խորհուրդը ՌԴ Պետդումա է ներկայացրել օրենքի նախագիծ, որը թույլ է տալիս կալանք դնել Ռուսաստանի այն քաղաքացիների գույքի վրա, ովքեր Ռուսաստանից դուրս «Ռուսաստանի շահերին հակառակ» գործունեություն են ծավալում:

Վարչական իրավախախտումների վերաբերյալ օրենսգրքում փոփոխությունների տեքստը հրապարակվել է Պետդումայի կայքում։ Տեղեկությունը տարածում է Deutsche Welle -ն։

Բացատրական գրառման մեջ նախաձեռնության հեղինակները նշում են, որ գործող օրենսդրությունը թույլ չի տալիս վարչական պատասխանատվության ենթարկել այլ երկրում ընդդիմադիր դիրք ունեցող ՌԴ քաղաքացիներին, եթե նրանք գործում են Ռուսաստանից դուրս։

Նախաձեռնության հեղինակները պնդում են նաև, որ Ուկրաինայում լայնածավալ պատերազմի սկսվելուց հետո ռուս ներգաղթյալներն ավելի հաճախ են իրականացնում «հրապարակային գործողություններ՝ կապված Ռուսաստանի տարածքային ամբողջականության և սահմանադրական կարգի հիմքերը խախտելու կոչերի հետ»։

«Նոր փոփոխությունների նպատակն է «կանխել» նման գործողությունները»,- ասել են Թաթարստանի պատգամավորները։

Ինչպես նշում են նախագծի հեղինակները, արտասահմանում Ռուսաստանի վարչական իրավախախտումների վերաբերյալ օրենսգիրքը խախտած ռուսաստանցիների ունեցվածքի բռնագրավումն անհրաժեշտ է՝ «ռուսական դատարանի կողմից նշանակված վարչական պատժից չխուսափելու համար»։

Երկիրը լքած իրավախախտները պատժամիջոցների մասին կտեղեկացվեն էլեկտրոնային փոստով և հեռախոսով, կամ նրանց օրինական ներկայացուցիչները կստանան այս տեղեկատվությունը:

2023 թվականի գարնանը Թաթարստանի Պետական ​​խորհուրդն արդեն նման օրինագիծ է ներկայացրել Պետդումային, սակայն այնուհետև Ռուսաստանի կառավարությունը այն հետ է ուղարկել լրամշակման։