Եվրախորհրդարանը շատ հստակ ուղերձ է հղում Բիձինա Իվանիշվիլիին և «Վրացական երազանքից» նրա համախոհներին, որ Եվրամիությանն անդամակցելը անհամատեղելի է նրանց քաղաքականության հետ։ Չի կարելի միաժամանակ լինել եվրոպամետ և ռուսամետ, չի կարելի սատարել եվրոպական ապրելակերպին և միաժամանակ գովաբանել Ստալինին,- այս մասին հայտարարել է եվրոպացի պատգամավոր Ռասա Յուկնևիչեյնեն Եվրախորհրդարանում Վրաստանի հարցով ընթացող բանավեճի ժամանակ։

Նրա խոսքով, Եվրախորհրդարանը ուշադիր հետեւելու է Վրաստանի խորհրդարանական ընտրություններին։

«Եվրախորհրդարանը ուշադիր հետեւելու է առաջիկա ընտրություններին։ Եվս մեկ անգամ կրկնում ենք, որ ընտրությունների անցկացումը պետք է լիովին համապատասխան լինի միջազգային չափանիշներին։ Եթե ​​«Վրացական երազանքը» շարունակի գնալ Լուկաշենկոյի ճանապարհով, ապա Եվրամիությունը պետք է գործի և վերագնահատի Վրաստանի պարտավորությունները, այդ թվում՝ վիզային ռեժիմի ազատականացման չափանիշները։ Մենք նաև կոչ ենք անում անհապաղ և անվերապահ ազատ արձակել Միխեիլ Սաակաշվիլիին։ Վրաստանի կառավարությունը պետք է ամբողջությամբ պատասխանատվություն կրի Սաակաշվիլիի կյանքին կամ առողջությանը հասցված ցանկացած վնասի համար։ Վրաստանի ապագայի վերաբերյալ որոշումը վրաց ժողովրդի ձեռքում է։ Հարգելի վրացիներ, ոչ ոք չի կարող ձեզանից ավելի պատասխանատու լինել Վրաստանի ապագայի համար։ Մենք հուսով ենք, որ Վրաստանի ժողովուրդը ճանապարհ կգտնի դեպի ժողովրդավարական եվրոպական ընտանիք»,- ասել է Եվրախորհրդարանի պատգամավորը։