Ռասա Յուկնևիչենե. Համաձայնագիրը նոր իրավիճակի սկիզբ է՝ ավելի քիչ ատելությամբ և, հնարավոր է, ավելի շատ համագործակցությամբ քաղաքական խմբերի միջև
Համաձայնագիրը նոր իրավիճակի սկիզբ է՝ ավելի քիչ ատելությամբ և, հնարավոր է, ավելի շատ համագործակցությամբ քաղաքական խմբերի միջև, – ասաց Եվրախորհրդարանի պատգամավոր Ռասա Յուկնևիչենեն՝ «Լելոյի» հետ հանդիպումից հետո:
Եվրախորհրդարանի պատգամավորը հույս ունի, որ Շառլ Միշելի փաստաթուղթը շուտով կստորագրվի բոլոր ընդդիմադիր կուսակցությունների կողմից:
«Լելոյի» հետ հանդիպումը, ինչպես միշտ, շատ յուրահատուկ էր ու ապագային միտված: Մենք խոսեցինք այն մասին, թե ինչպես կարող է կատարվել համաձայնագիրը: Ուրախ ենք, որ համաձայնագիրը ստորագրվեց, չնայած դեռ ոչ բոլոր քաղաքական կուսակցություններն են ստորագրել այն: Հուսով ենք՝ կանեն: Պարտադիր է, որ ամենամեծ քաղաքական կուսակցությունը լինի համաձայնության մասնակից: Մենք խոսեցինք բանտարկված քաղաքական առաջնորդների և այն մասին, թե ինչպես լուծել այս խնդիրը, ինչպես կարող ենք օգնել, և մենք պատրաստ ենք դրան: Վրաստանի խորհրդարանին անհրաժեշտ է ուժեղ, իրական ընդդիմություն: Մենք խոսեցինք նաև ապագայի, հատկապես 2024 թվականի մասին, երբ իշխող կուսակցությունը ծրագրում է դիմել Եվրամիությանը Վրաստանի անդամակցության համար: Մենք խոսեցինք այս հարցի շուրջ մեր համագործակցության մասին:
Հիմա կարևոր չէ գտնել մեղավորներին և հիմնական մեղավորներին: Վրաստանը հնարավորություն ունի օգտագործել այս պահը, քանի որ համաձայնագիրը նոր իրավիճակի սկիզբ է՝ ավելի քիչ ատելությամբ և գուցե ավելի շատ համագործակցությամբ քաղաքական խմբերի միջև:
Հատկապես կարևոր է Նիկա Մելիայի հարցը: Կարծում եմ, որ իշխող կուսակցությունը և ընդդիմությունը, ԵՄ կառույցների օգնությամբ, ելք կգտնեն: Մելիան շուտով ազատ կարձակվի, և «Միացյալ ազգային շարժումը» կմիանա խորհրդարանին», – ասաց Ռասա Յուկնևիչենեն:
Ըստ Եվրախորհրդարանի պատգամավորի, համաձայնագրի պայմանների չկատարումը աղետ կլինի:
«Ես գիտեմ, թե որքան դժվարությունների է բախվել իմ երկիրը նախքան ՆԱՏՕ-ի և Եվրամիության անդամ դառնալը, անընդհատ խառնաշփոթություն է եղել: Այնպես որ, սա բնորոշ չէ միայն Վրաստանին: Միակ տարբերությունը կարող է լինել այն, որ մենք ավելի հյուսիսային ենք, իսկ դուք՝ ավելի հարավային: Վրաստանի, կամ այն պետության համար, որը ոչ վաղ անցյալում վերականգնել է իր անկախությունը, այժմ երիտասարդության շրջան է: Սա անցման տարիք է և ուղեկցվում է դժվարություններով: Սա ուղեկցվում է տնտեսական և սոցիալական խնդիրներով և այլն:
Եթե համաձայնագիրը չկատարվի, դա աղետ կլինի: Հուսով եմ, որ դա տեղի չի ունենա: Նման սցենար չեմ էլ դիտարկի: Հուսով եմ, որ իշխող կուսակցությունը գիտակցում է իր պատասխանատվությունը, քանի որ բոլոր գործիքներն իրենց ձեռքում են», – ասաց եվրախորհրդարանականը: