Ուկրաինան և Մոլդովան հունիսին կսկսեն ԵՄ անդամակցության վերաբերյալ պաշտոնական բանակցություններ, հաղորդում է Politico-ն։

Հրապարակման համաձայն՝ Հունգարիան ազդանշան է տվել, որ կդադարեցնի Ուկրաինայի՝ դաշինքին միանալու ձգտման նկատմամբ իր երկարատև դիմադրությունը, ինչը թույլ կտա նրան և Մոլդովային առաջիկա օրերին սկսել դաշինքին միանալու վերաբերյալ պաշտոնական բանակցություններ։

Երեք դիվանագետների խոսքով՝ բանակցությունների առաջին խմբի բացումը, որը անդամակցության ճանապարհին պաշտոնական քայլ է, նախատեսված է հունիսի 15-ին՝ Լյուքսեմբուրգում կայանալիք միջկառավարական համաժողովում։

Կիևը և Քիշնևը միաժամանակ դիմել են ԵՄ անդամակցության համար, ինչը նշանակում է, որ Մոլդովայի հայտը կարող է առաջ շարժվել միայն այն դեպքում, եթե հաստատվի նաև Ուկրաինայի առաջարկը։

Բուդապեշտը նախկին վարչապետ Վիկտոր Օրբանի օրոք կտրականապես դեմ էր Ուկրաինայի անդամակցությանը, սակայն երկրի նոր ղեկավարությունը ոչ պաշտոնապես պատրաստակամություն հայտնեց վերացնել վետոն երկուշաբթի օրը՝ Ուկրաինայում բնակվող հունգարացիների իրավունքների վերաբերյալ ուկրաինացի և հունգարացի փորձագետների միջև հանդիպումից հետո։ ԵՄ դեսպանները վերջնական դիրքորոշում կհայտարարեն Ուկրաինայի և Մոլդովայի համար առաջին խմբի բացման վերաբերյալ այս շաբաթվա վերջին, այն բանից հետո, երբ Ուկրաինան ներկայացնի ներքին բարեփոխումների, ինչպես նաև փոքրամասնությունների հարցի լուծման ծրագրեր։ Կլաստերների բացման համար անհրաժեշտ է ԵՄ բոլոր 27 անդամ պետությունների միաձայն համաձայնությունը։ Ցանկացած երկիր կարող է արգելափակել գործընթացը ցանկացած փուլում։