Գերմանիայի իշխող կոալիցիան փլուզվեց այն բանից հետո, երբ կանցլեր Օլաֆ Շոլցը պաշտոնանկ արեց ֆինանսների նախարար Քրիստիան Լինդներին։ Այս մասին գրում է «Politico»-ն։

Շոլցը նախարարին աշխատանքից ազատել է տնտեսական բարեփոխումների շուրջ տարաձայնությունների պատճառով՝ նշելով, որ նախարարը բազմիցս անպատշաճ կերպով արգելափակել է օրենքները։ Շոլցը նաև ասում է, որ ինքը խնդրել է Լինդներին թեթևացնել բյուջեի կանոնները՝ Ուկրաինային ավելի շատ օգնություն տրամադրելու համար, սակայն Լինդները մերժել է՝ ասելով, որ նման քայլը կխախտի իր պաշտոնավարման երդումը:

Իր հերթին Լինդները քննադատել է Շոլցի մեկնաբանությունները Գերմանիայի տնտեսական թուլության մասին։

«Օլաֆ Շոլցը երկար ժամանակ չէր կարողանում ընկալել մեր երկրում տնտեսական նոր զարթոնքի անհրաժեշտությունը»,- ասել է նախկին նախարարը։

Ինչպես հայտնի է, անհամաձայնությունը սկսվել է այն ժամանակ, երբ Քրիստիան Լինդների Ազատ դեմոկրատական ​​կուսակցության առաջարկին՝ ազատական ​​տնտեսական բարեփոխումներ իրականացնելու վերաբերյալ, հակադարձել են կոալիցիայի մյուս երկու անդամները՝ Օլաֆ Շոլցի Սոցիալ-դեմոկրատական ​​կուսակցությունը և Կանաչները։

Ըստ «Politico»-ի՝ Օլաֆ Շոլցը կարող է շարունակել կառավարել, թեպետ բյուջեն հաստատելու համար մեծամասնություն չի ունենա, ինչը մեծացնում է արտահերթ ընտրությունների հավանականությունը։ Արտահերթ ընտրությունները կարող են անցկացվել մարտին։