Հունգարիայի արտաքին գործերի նախարար Պիտեր Սիյարտոյի հայտարարության համաձայն՝ Բուդապեշտը շահագրգռված է Միջին միջանցքի զարգացմամբ։ Այս մասին նա հայտարարել է ադրբեջանական լրատվամիջոցներին տված հարցազրույցում։

Նրա խոսքով, այդ առումով «Միջին կանաչ միջանցքի» շրջանակներում Հունգարիան համագործակցում է Ադրբեջանի, Վրաստանի եւ Ռումինիայի հետ։

«Չինաստանը ներկայումս Հունգարիայի տնտեսության համար ներմուծման երկրորդ աղբյուրն է։ Հունգարիան Կենտրոնական Եվրոպայում չինական ներդրումների թիվ մեկ երկիրն է։ Մենք տարածաշրջանում գնում ենք ավելի ու ավելի շատ էներգակիրներ, այդ թվում՝ նավթ Ղազախստանից և բնական գազ՝ Ադրբեջանից։ Ուստի մենք բացարձակապես շահագրգռված ենք Ասիայի և Եվրոպայի միջև երթուղիների թողունակության մեծացմամբ։ Սա նշանակում է, որ մենք կցանկանայինք նպաստել միջին միջանցքի թողունակության ավելացմանը՝ լինի դա տրանսպորտային երթուղի, երկաթուղային, թե էլեկտրաէներգիայի և բնական գազի փոխադրում։ Այս առումով մենք օրինակելի համագործակցություն ունենք Ադրբեջանի, Վրաստանի և Ռումինիայի հետ «Միջին կանաչ միջանցք» նախագծի շրջանակներում»,- ասաց Հունգարիայի ԱԳ նախարարը։