ԱՄՆ պետքարտուղար Էնթոնի Բլինքենը հեռախոսազրույց է ունեցել Լիբանանի վարչապետի պաշտոնակատար Նաջիբ Միքաթիի հետ։ Այս մասին տեղեկություն է տարածում Պետդեպարտամենտը։

Բլինքենը նաև նշում է, որ անհրաժեշտ է պաշտպանել լիբանանցիների շահերը, քանի որ Լիբանանի ներգրավվածությունը Իսրայելի վրա «Համասի» ահաբեկչության հետևանքով առաջացած հակամարտությանը կազդի նրանց վրա։

Պետքարտուղարն իր զորակցությունն է հայտնել լիբանանցիներին և մտահոգություն հայտնել Լիբանանի հարավային սահմանի երկայնքով տիրող լարվածության կապակցությամբ։

«Բլինքենն իր ցավակցությունն է հայտնել հակամարտությունում ողբերգականորեն կորցրած լիբանանցի խաղաղ բնակիչների ընտանիքներին՝ ընդգծելով Միացյալ Նահանգների շարունակական աջակցությունը Լիբանանի զինված ուժերին և ներքին անվտանգության ուժերին, որոնք Լիբանանի կայունության և տարածքային ամբողջականության միակ օրինական երաշխավորներն են»,- ասված է հայտարարության մեջ։

Իսրայելական զինվորականները երկու օր առաջ հայտարարեցին, որ հարձակվել են Լիբանանի սահմանի մոտ գտնվող Հեզբոլլահի ռազմական օբյեկտների վրա։ Իսրայելի պաշտպանության բանակը հայտարարել է, որ հարվածները հասցվել են ի պատասխան Իսրայելում տեղի ունեցած կրակոցների: Ավելի ուշ Իսրայելի պաշտպանության նախարարությունը հրամայեց պարտադիր տարհանել Լիբանանի հետ սահմանին մոտ գտնվող Կիրյաթ Շմոնա քաղաքի բնակչությանը։