Պետեր Մադյարը հայտարարում է, որ, հնարավոր է, Հունգարիայի միակ «Պակշ» ատոմային էլեկտրակայանի բոլոր ռեակտորների աշխատանքը օգոստոսի 4-ին կամ 5-ին ամբողջությամբ դադարեցվի
Հունգարիայի վարչապետ Պետեր Մադյարը հայտարարել է, որ Դանուբ գետի ջրի ցածր մակարդակի պատճառով երկրի միակ «Պակշ» ատոմային էլեկտրակայանի բոլոր ռեակտորների աշխատանքը, հնարավոր է, օգոստոսի 4-ին կամ 5-ին ամբողջությամբ դադարեցվի։
Ինչպես Մադյարը նշել է ատոմային էլեկտրակայանի տարածքում կայացած մամուլի ասուլիսում, «Պակշի» ատոմային էլեկտրակայանի վերջին գործող էներգաբլոկը կանջատվի, եթե Դանուբի ջրի մակարդակը իջնի մինուս 134 սանտիմետրից։ Այժմյան կանխատեսումների համաձայն՝ դա կարող է տեղի ունենալ երեքշաբթի կամ չորեքշաբթի օրը։
Առաջին բլոկի վերագործարկման համար, հավանաբար, մի քանի օր կպահանջվի, իսկ ատոմային էլեկտրակայանը լրիվ հզորությամբ կաշխատի միայն այն ժամանակ, երբ ջրի մակարդակը գերազանցի մինուս 107 սանտիմետրը։
Մադյարը նշել է, որ ստեղծված իրավիճակը էլեկտրաէներգիայի մատակարարման հետ կապված խնդիրներ է ստեղծում, սակայն միջուկային անվտանգության համար սպառնալիք չի ներկայացնում։
Բացի այդ, Մադյարը քննադատել է նախորդ կառավարությանը նրա համար, որ Բրյուսելի հետ նրա հակամարտության պատճառով երկիրը չկարողացավ ստանալ Եվրոմիության ֆինանսավորումը, որը կուղղվեր վերականգնվող էներգետիկայի զարգացմանը։
«Հիմա մենք փորձով ենք հասկանում, թե որքան են մեզ անհրաժեշտ Եվրոմիության միջոցները, որոնցներգրավումը նախորդ կառավարությունը չկարողացավ իրականացնել», – նշել է Մադյարը։
Նրա խոսքով՝ առաջիկա տարիներին Հունգարիան կսկսի զգալի քանակությամբ հողմային տուրբինների և էներգիայի պահպանման հզորությունների կառուցումը։