Պավել Հերչինսկի. Ես անկեղծորեն հույս ունեմ, որ ճանապարհ կգտնվի, որպեսզի Վրաստանի խորհրդարանում չընդունվի «Օտարերկրյա ազդեցության թափանցիկության մասին» օրենքը
Վրաստանում Եվրամիության դեսպան Պավել Հերչինսկու խոսքով՝ եթե «Օտարերկրյա ազդեցության թափանցիկության մասին» օրենքի նախագիծն ընդունվի ներկայիս տեսքով, դա լուրջ խոչընդոտ կստեղծի Վրաստանի՝ Եվրամիությանն ինտեգրվելու ճանապարհին։
Հերչինսկու խոսքով՝ նշված օրինագիծը չի համապատասխանում Եվրամիության նորմերին ու արժեքներին։
«Դուք ինձ հարց ուղղեցիք արտաքին ազդեցության թափանցիկության մասին օրենքի նախագծի վերաբերյալ։ Թույլ տվեք կրկնել այն, ինչ բազմիցս ասել են եվրոպացի առաջնորդները, Եվրամիության կառույցների ներկայացուցիչները։ Եթե այս օրենքի նախագիծն իր ներկայիս տեսքով ընդունվի Վրաստանի խորհրդարանում, դա լուրջ խոչընդոտ կստեղծի Վրաստանի՝ Եվրամիությանն անդամակցելու համար։ Ինչու, որովհետև այս օրենքն իր ներկայիս տեսքով համատեղելի չէ այն նորմերի և արժեքների հետ, որոնք ունենք մենք՝ Եվրամիության 27 անդամ երկրները։ Ես անկեղծորեն հույս ունեմ, որ ճանապարհ կգտնվի, որպեսզի այս օրենքը չընդունվի Վրաստանի խորհրդարանում։ Ես գիտեմ, որ հաջորդ շաբաթ նախատեսված է երրորդ լսում, և մենք անկեղծորեն հուսով ենք, որ դեռ կա հնարավորություն, որ օրինագիծը չընդունվի: Եթե դա այդպես չէ, ապա պետք է օգտագործել բոլոր ընթացակարգային հնարավորությունները, որպեսզի օրենքը չընդունվի ներկայիս տեսքով: Ցավոք, եթե ընդունվի, Եվրամիության և նրա անդամ երկրները այլ ելք չեն ունենա, քան մտածել բացասական արձագանքների մասին։
Վրաստանում օրենքները պետք է ընդունի Վրաստանի խորհրդարանը, այլ ոչ թե որևէ մեկը, բայց իմ պարտականությունն է՝ որպես Վրաստանում Եվրամիության դեսպանի, պարզաբանել այս օրինագծի ընդունման հետևանքները։ Եվս մեկ անգամ կարող եմ կրկնել, որ եթե այս օրենքն ընդունվի ներկայիս տեսքով, ապա դա լուրջ խոչընդոտ կստեղծի Վրաստանի՝ Եվրամիությանն ինտեգրվելու համար։ Այդ իսկ պատճառով մենք ցանկանում ենք օգնել ստեղծված իրավիճակից ելք գտնելու հարցում։ Մենք տեղյակ ենք, որ Վենետիկի հանձնաժողովին, որը իրավական հարցերի միջազգային չափորոշիչ է, խնդրել են տրամադրել իր իրավական կարծիքը այս օրինագծի վերաբերյալ: Վենետիկի հանձնաժողովը Եվրամիության հետ կապ չունի, դա Եվրախորհրդի մարմին է, Վրաստանը Եվրախորհրդի անդամ է, Եվրախորհրդի լիիրավ անդամ, ես անկեղծորեն հուսով եմ, որ իրավական կարծիքը կլինի. կհրապարակվի շատ շուտով, և Վրաստանի խորհրդարանին է կախված, թե ինչպես վարվի Վենետիկի հանձնաժողովի այս կարծիքից հետո։ Եվս մեկ անգամ կարող եմ կրկնել, որ մենք անկեղծորեն հույս ունենք, որ այս օրենքն իր ներկայիս տեսքով չի ընդունվի»,- ասաց Պավել Հերչինսկին։
