Եվրամիության համար չափազանց կարևոր է, որ Վրաստանում առաջիկա խորհրդարանական ընտրություններն անցնեն ազատ և արդար,- այս մասին «Արդար ընտրությունների» գրասենյակում հայտարարել է Վրաստանում Եվրամիության դեսպան Պավել Հերչինսկին, որտեղ հանդիպել է «ISFED»-ի գործադիր տնօրենի, Նինո Դոլիձեի և կազմակերպության աշխատակիցների հետ:

Ինչպես նշել է Հերչինսկին, նա կոչ է անում բոլոր քաղաքական կուսակցություններին, հատկապես կառավարությանը, ապահովել ընտրությունների անցկացումը միջազգային ամենաբարձր չափանիշներով։

«Ես ISFED-ի գլխավոր գրասենյակում եմ։ Շնորհակալ եմ Նինո Դոլիձեին և նրա թիմին մեզ հյուրընկալելու համար։ Եվրամիության համար չափազանց կարևոր է, որ Վրաստանում առաջիկա խորհրդարանական ընտրությունները լինեն ազատ և արդար, մրցակցային, թափանցիկ, ներառական և, առաջին հերթին, առանց բռնության։ Պետք է խուսափել բռնությունից: Կոչ եմ անում բոլոր քաղաքական կուսակցություններին, հատկապես կառավարությանը, ապահովել ընտրությունների անցկացումը միջազգային ամենաբարձր չափանիշներով։

Որպես ԵՄ՝ մենք աջակցել ենք քաղաքացիական հասարակության կազմակերպություններին։ Հատկապես այն կազմակերպությունները, որոնք ներգրավված են տեղական դիտորդական գործընթացում, կխաղան հիմնական դերերից մեկը ընտրությունների ամենաբարձր մակարդակով անցկացումն ապահովելու գործում։ Որպես ԵՄ՝ մենք հպարտ ենք աջակցել «ISFED»-ին և այլ տեղական մոնիտորինգ իրականացնող կազմակերպություններին: Մենք հուսով ենք, որ հոկտեմբերի 26-ից հետո կունենանք նոր կառավարություն, և անկախ նրանից, թե ով հաղթի ընտրություններում, այս նոր կառավարությունը կվերսկսի բարեփոխումները, որոնք անհրաժեշտ են եվրոպական ճանապարհին հաջողության հասնելու համար»,- ասել է Պավել Հերչինսկին։