Պատժամիջոցների հարցերով Եվրամիության հատուկ ներկայացուցիչ Դեյվիդ Օ'Սալիվանն այսօր երկօրյա այցով կայցելի Թբիլիսի
Պատժամիջոցների հարցերով Եվրամիության հատուկ ներկայացուցիչ Դեյվիդ Օ’Սալիվանն այսօր երկօրյա այցով կայցելի Թբիլիսի։ Այս մասին տեղեկություն է տարածում Վրաստանում Եվրամիության ներկայացուցչությունը։
Սեփական հաղորդագրությունների համաձայն՝ Դեյվիդ Օ’Սալիվանը Վրաստանի իշխանությունների հետ քննարկելու է ընդհանուր հետաքրքրություն ներկայացնող հարցեր, մասնավորապես՝ պատժամիջոցները և դրանց արդյունավետ իրականացումը։
«Այցի նպատակն է բացել ուղիղ կապի ալիք և երկխոսություն հաստատել՝ հիմնված ապագա համագործակցության վրա։ Վրաստանի կառավարությունը համագործակցելու մեծ պատրաստակամություն է հայտնել հատուկ ներկայացուցչի այցի համար առանձնահատուկ նշանակություն ունեցող հարցերի շուրջ, և հույս կա, որ սերտ համագործակցությունը կշարունակվի։
Այցի շրջանակներում հանդիպումներ կկայանան Վրաստանի վարչապետ Իրակլի Ղարիբաշվիլիի, արտաքին գործերի նախարար Իլիա Դարչիաշվիլիի, փոխվարչապետ և էկոնոմիկայի նախարար Լևան Դավիթաշվիլիի, ֆինանսների նախարար Լաշա Խուցիշվիլիի, Ազգային բանկի նախագահի պաշտոնակատարի և գլխավոր դատախազի հետ։
Դեյվիդ Օ’Սալիվանը կհանդիպի նաև բիզնեսի ներկայացուցիչների հետ։ Այցի շրջանակներում կկայանա Օ’Սալիվանի հանդիպումը մամուլի հետ՝ տեղանքի և ժամի մասին տեղեկատվություն կտրամադրվի։ Սա կլինի համատեղ այց, որին կմասնակցեն նաև ԱՄՆ-ի Պետդեպարտամենտի Պատժամիջոցները համակարգող գրասենյակի ղեկավար, դեսպան Ջիմ Օ’Բրայենը և Միացյալ Թագավորության արտաքին գործերի, համագործակցության և զարգացման գրասենյակի տնտեսության, գիտության և տեխնոլոգիաների գծով գլխավոր տնօրեն Կումար Այերը»,- ասված է Եվրամիության ներկայացուցչության կողմից տարածած տեղեկատվության մեջ։