Պատվաստումը կրոնական ծանրաբեռնվածություն չունի, անթույլատրելի է, որ հոգևորականն արգելի հավատացյալներին պատվաստվել կրոնական նկատառումներով կամ սահմանափակել հաղորդությունը պատվաստումների պատճառով,- այս մասին ասվում է հայտարարության մեջ, որը տարածում է Վրաստանի պատրիարքարանը։

«Մենք ևս մեկ անգամ հանրությանը կհիշեցնենք Վրաց ուղղափառ եկեղեցու պաշտոնական դիրքորոշումը կորոնավիրուսի դեմ պատվաստման վերաբերյալ, որն արտացոլված է Սինոդի որոշման մեջ։

Թեև մի քանի անգամ բացատրվել է, սակայն վերջին ժամանակներում որոշ հոգևորականների որդեգրած արմատական ​​դիրքորոշման պատճառով նորից կրկնենք, որ պատվաստանյութը կրոնական ծանրաբեռնվածություն չունի։ Եվ այսպիսով, անթույլատրելի է, որ եկեղեցականը կրոնական նկատառումներով հավատացյալներին արգելի կատարել այս ընթացակարգը կամ սահմանափակել հաղորդությունը, քանի որ նրանք պատվաստվել են: Ինչ վերաբերում է բուժման այս մեթոդին, ապա, անշուշտ, լիովին անընդունելի է քրիստոնյայի կողմից կոպիտ և վիրավորական կոչեր տարածելը: Սբ. Սինոդի որոշմանը հակասում է նաև քահանայի կողմից ծխական ծառայության ժամանակ շնչադիմակ կրելու արգելքը։

Մենք նաև նշում ենք, որ եկեղեցին չի կարող աջակցել հարկադիր պատվաստմանը, ինչ պատճառով էլ դա թելադրվի։ Յուրաքանչյուր ոք պետք է ունենա ազատ ընտրություն կատարելու հնարավորություն։ Դա Աստծո կողմից տրված անձեռնմխելի իրավունք է և պետք է պաշտպանվի։

Եվս մեկ անգամ դիմում ենք հոգևորականներին, որպեսզի պատվաստումների հետ կապված իրենց գործողությունները չանցնեն Սինոդի որոշումից այն կողմ։ Կամայականության դեպքում ծխական համայնքը կարող է դիմել Վրաստանի պատրիարքարան»,- ասված է պատրիարքարանի հայտարարության մեջ։