Ընթանում է հետաքննություն Ուկրաինայում Վրաստանի կառավարության նախկին բարձրաստիճան պաշտոնյաների կազմակերպմամբ և ֆինանսավորմամբ հանցավոր արարքների, այդ թվում՝ Բիձինա Իվանիշվիլիի սպանության նախապատրաստման փաստերի առնչությամբ,- այս մասին ասված է Վրաստանի Պետական ​​անվտանգության ծառայության հաղորդագրության մեջ։

«Հասարակության բարձր հետաքրքրությունից ելնելով` տեղեկացնում ենք հանրությանը, որ Պետական ​​անվտանգության ծառայությունը հետաքննություն է վարում ահաբեկչության նախապատրաստման և պետական ​​իշխանությունը տապալելու դավադրության փաստով։ Հանցանքը նախատեսված է Վրաստանի քրեական օրենսգրքի 18-323 հոդվածի առաջին մասով և 315-րդ հոդվածի առաջին մասով։

Պետական ​​անվտանգության ծառայությունը հետաքննում է «Վրացական երազանք» կուսակցության պատվավոր նախագահ Բիձինա Իվանիշվիլիի սպանության նախապատրաստման փաստերը՝ Վրաստանի կառավարության նախկին բարձրաստիճան պաշտոնյաների և իրավապահ մարմինների նախկին աշխատակիցների կազմակերպմամբ և ֆինանսավորմամբ։

Նշված հանցավոր գործողությունների նպատակը անկարգություններ ստեղծելու և իշխանությունը թուլացնելու ֆոնին քայքայիչ ուժերով բռնի միջոցներով պետական ​​իշխանությունը տապալելն է։

Քրեական գործով իրականացվում են ակտիվ քննչական և օպերատիվ-որոնողական միջոցառումներ, որոնց շրջանակներում կոնկրետ անձինք կանչվում են քննչական մարմին՝ որպես վկա հարցաքննվելու», – ասված է ՊԱԾ-ի հաղորդագրության մեջ։