Բաթումիում պայթուցիկ սարքերի մասին ծանուցումներ են արվել երկրից դուրս, նշված է եղել Վրաստանի անչափահաս քաղաքացու հեռախոսահամարը,- այս մասին ասված է Վրաստանի Պետական ​​անվտանգության ծառայության հաղորդագրության մեջ։

«Ընթացիկ տարվա հունվարի 21-ին տեղեկություններ են ստացվել Բաթումի քաղաքի տարբեր վայրերում հնարավոր պայթուցիկ սարքերի տեղադրման մասին։

Ստացված հաղորդագրությունների կապակցությամբ Պետական ​​անվտանգության ծառայության և ՆԳ նախարարության հակաահաբեկչական ստորաբաժանումների կողմից հատուկ միջոցներ են ձեռնարկվել Բաթումի քաղաքի առևտրի կենտրոններում և ուսումնական հաստատություններում, որտեղ պայթուցիկ նյութ կամ սարք չի հայտնաբերվել։

Այս փուլում ձեռք բերված օպերատիվ տվյալների վերլուծության համաձայն՝ պայթուցիկ սարքերի տեղադրման մասին ծանուցումներ են արվել երկրից դուրս, որտեղ դիտավորյալ նշված է եղել Վրաստանի անչափահաս քաղաքացու օգտագործած բջջային հեռախոսահամարը»,- հայտարարել են ՊԱԾ-ում։

Քրեական գործով հետաքննություն է տարվում՝ ահաբեկչության մասին սուտ մատնության դեպքի առթիվ։

ՊԱԾ-ից հայտնում են, որ ընթացիկ օպերատիվ-հետախուզական միջոցառումների շրջանակում հաղորդագրությունները նախաձեռնողին հայտնաբերելու նպատակով աջակցության համար ծանուցվել են գործընկեր երկրների գերատեսչությունները։

«Բացի այդ, ցանկանում ենք հանրությանը տեղեկացնել, որ 2023 թվականի դեկտեմբերի 30-ին և այս տարվա հունվարի 17-ին արտերկրից ստացվել են «Գալերեա Թբիլիսի»-ում տեղի ունեցած ահաբեկչության մասին կեղծ հաղորդումներ և կապված են միջազգային առցանց խաղերի հետ, որոնց մասնակցում են անչափահասներ, տարբեր երկրներից, այդ թվում՝ Վրաստանից։

Ինչպես նաև նշված հաղորդագրությունների նախաձեռնողները բացահայտվում են որպես արտերկրում գտնվող անձանց կոնկրետ խումբ։ Փաստի առթիվ ձեռնարկվել են համապատասխան հատուկ միջոցառումներ։

Գործը քննվում է Պետական ​​անվտանգության ծառայության հակաահաբեկչական կենտրոնի կողմից»,- ասված է ՊԱԾ-ի հաղորդագրության մեջ։