Վրաստանի համար չափազանց կարևոր է հաստատել Եվրամիությանն անդամակցելու իր հանձնառությունը և առաջ շարժվել Եվրամիության ճանապարհով, ասել է Ընդլայնման հարցերով եվրահանձնակատար Օլիվեր Վարհեյը։

Վարհեյի խոսքով, Եվրամիությունը պատրաստ է ընդլայնմանը և պատրաստ է առաջիկա տարիներին ընդունել նոր անդամ երկրներին։

«Մենք պատմական որոշումներ ենք կայացրել անցած ամիսների և տարիների ընթացքում, և ես հպարտ եմ ընդլայնման հարցում Հանձնաժողովի հաջողությամբ, քանի որ այն իսկապես տպավորիչ է: Կազմակերպությանն անդամակցելու չորս նոր հայտ ենք ստացել։ Այդ երկրներն են Ուկրաինան, Մոլդովան, Վրաստանը և Կոսովոն։ Թեկնածուի կարգավիճակ շնորհվել է Ուկրաինային, Մոլդովային, Վրաստանին և Բոսնիա-Հերցեգովինային։ Վրաստանի համար շատ կարևոր է հաստատել ԵՄ-ին անդամակցելու իր հավատարմությունը և առաջ շարժվել ԵՄ ճանապարհով: Թեկնածուները և պոտենցիալ թեկնածուները պետք է լիարժեք նվիրվածություն ցուցաբերեն բարեփոխումների իրականացմանը։ Միևնույն ժամանակ, մենք պետք է նաև ապահովենք, որ ընդլայնման քաղաքականությունը մնա վստահելի, կանխատեսելի և դինամիկ։ Եվրամիությունը պատրաստ է ընդլայնմանը և պատրաստ է առաջիկա տարիներին ողջունել նոր անդամ երկրներին»,- ասել է Օլիվեր Վարհեյը։