Եվրամիությունը կանի ամեն ինչ, որպեսզի կախված չլինի ռուսական էներգառեսուրսներից, սակայն այս պահին կազմակերպությունը չի կարող ամբողջությամբ հրաժարվել ռուսական էներգետիկ ռեսուրսներից,- ասել է Գերմանիայի կանցլեր Օլաֆ Շոլցը՝ Եվրախորհրդարանի նախագահ Ռոբերտա Մեցոլայի հետ հանդիպումից հետո կայացած ճեպազրույցում։

Օլաֆ Շոլցը և Ռոբերտա Մեցոլան քննարկել են Ուկրաինայում ռուսական ագրեսիան և Ռուսաստանի դեմ պատժամիջոցները։

Գերմանիայի կանցլերի խոսքով՝ Ռուսաստանի դեմ պատժամիջոցների ազդեցությունն արդեն տեսանելի է, և այն օրեցօր ավելի դրամատիկ է դառնալու։

Այդուհանդերձ, Շոլցը նշել է, որ էներգետիկ ռեսուրսների վրա էմբարգո կիրառելու վերաբերյալ Գերմանիայի դիրքորոշումը մնում է անփոփոխ։

«Մենք որոշել ենք որքան հնարավոր է շուտ անկախանալ Ռուսաստանի էներգետիկ ռեսուրսներից և այդ հարցով աշխատում ենք ամեն օր ու ինտենսիվ։ Սա պահանջում է ենթակառուցվածքների ստեղծում և այլ մատակարարների հետ նոր պայմանագրերի կնքում։ Եթե դիվերսիֆիկացիան արագ տեղի ունենա, ապա արդյունքը կլինի ավտոմատ», – ասաց Օլաֆ Շոլցը: