Շատ ակտիվություն կա, մենք տեսնում ենք, որ մեր համախոհներն ակտիվորեն մասնակցում են այս գործընթացին, ինչը շատ կարևոր է,- այս մասին հայտարարել է «Ազգային շարժման» նախագահի թեկնածու Նոնա Մամուլաշվիլին։

Նրա խոսքով՝ տեխնիկական ուշացումներ են եղել, որոնց վրա արդեն աշխատանքներ են տարվում։

«Ինչպես մեզ ասում են, այս խնդիրը կլուծվի մինչև օրվա վերջ։ Ինչ վերաբերում է մնացածին, ապա մենք տեսնում ենք, որ այս ընտրություններն առանձնանում են ակտիվության շատ բարձր մակարդակով»,- ասել է Մամուլաշվիլին։

Լրագրողները նրան հարցրել են նաև նախկին նախագահ Միխեիլ Սաակաշվիլիի՝ «Spiegel»-ին տված հարցազրույցի մասին։ Ըստ Մամուլաշվիլիի՝ փոխադարձ մեղադրանքները վնասակար են ընտրական գործընթացի համար։

«Ես ծանոթացել եմ այս հարցազրույցին։ Տեսանք, որ կարծիքների տարբերություն կար։ Կարծում եմ, որ գրվածը, ցավոք, շահարկված էր։ Այնքան շատ մարդիկ են փորձել օգտագործել այն լավ կամ վատ: Ամեն դեպքում վնասակար է, որ գործընթացն ընթանում է նման լարված, փոխադարձ մեղադրանքների ֆոնին։ Կոչ եմ անում իմ կուսակիցներին ու մրցակիցներին ամեն ինչ անել, որպեսզի պահպանենք արժանապատվությունը և չշահագործենք որևէ կոնկրետ առարկա։ Ուստի կարևոր է, որ բնակչությանը և համախոհներին ցույց տանք, որ մենք կարող ենք քարոզչություն անել առանց կարմիր գծերը հատելու և ցույց տալ, թե ինչպես պետք է անցկացվեն ընտրությունները։ Մենք պետք է ավարտենք այս արշավն այնպես, որ վերջում չամաչենք, նայենք միմյանց աչքերի մեջ»,- ասել է Մամուլաշվիլին։

Վրաստանի նախկին նախագահ Միխեիլ Սաակաշվիլիի հարցազրույցը հրապարակվել է «Spiegel»-ում։ Ինչպես նշում է Սաակաշվիլին. «Հնարավոր է, որ նրանցից ոմանք, ովքեր ծրագրել էին իմ վերադարձը Վրաստան 2021 թվականի հոկտեմբերին, եղել են Ռուսաստանի ներդրված գործակալներ»։

Բացի այդ, հարցազրույցում Միխեիլ Սաակաշվիլիին հարց է տրվել նաև տեսանյութի վերաբերյալ, որում, ըստ «Spiegel»-ի լրագրողի, երևում է, որ նա ագրեսիա է ցուցաբերում կլինիկայի անձնակազմի նկատմամբ և իրերը շպրտում։ Ինչպես ասել է Սաակաշվիլին, դատավորն ու դատախազը պատրաստվում էին դատավարությունն անցկացնել իր պալատում, չնայած այն բանին, որ նա ջերմություն, ճնշում ու գլխուղեղի բորբոքում ուներ, և այդ պատճառով էլ նա ընդունել էր դեղամիջոցը։